IBafana ivivele i-Afcon ngokuguqisa iZambia kowesihle
UMDLALI weBafana Bafana uMohau Nkota oshaye igoli lesibili ngesikhathi iqembu lakuleli liguqisa iZambia ngo 3-1 kowobungani eNeslon Mandela Bay Stadium.
Image: BACKPAGEPIX
IBafana Bafana yenze obekufunwe ngumqeqeshi uHugo Broos, inqoba iZambia ngo 3-1 kowobungani eNelson Mandela Bay Stadium.
Kulo mdlalo iqembu lakuleli eliwuphathe uqala waze wayophela likhombisile ukuthi amagoli lingawathola ngezindlela ezehlukene,.
Okungeke kumjabulise uBroos ukuthi lidedele igoli umdlalo usuyophela, limosha irekhodi lokuvala ngci emuva emidlalweni eyisishiyagalolunye kwengu-10 eliyidlale ngaphambi kwalo mdlalo.
Kuyiwe ekhefini iBafana ihamba phambili ngo 1-0 ngemuva kwegoli elibekwe enethini u-Oswin Appollis eqhamuka ngakwesokunxele sekusele imizuzu emibili kuphele isiwombe.
Igoli lesibili lingene ngomzuzu ka-67 ngesikhathi ingcwenga yephasi kaSipho Mbule ithola uMohau Nkota, wadlulisa isitobha ebesithi siyamvimba ngaphambi kokulivalela phakathi ngobunyonico.
Kudlule imizuzu eyisithupha ngaphambi kokuthi iBafana izithole isihamba phambili ngamagoli amathathu. USiphephelo Sithole, oqale umnyakazo oholele kwigoli lika-Appollis, ugxume engamakiwe ebhokisini kuyikhona, walibeka phakathi ngekhanda.
IChipolopolo ithole umthobanhliziyo ngesikhathi esengezwe ngunompempe. USabobo Banda ugqashule esuka esiswini, washaya ishodi alizwe ngendaba uSipho Chaine, ongene endaweni kaRonwen Williams ekuqaleni wesiwombe sesibili.
Kulo mdlalo kuphindwe kwahlonishwa injini yeMamelodi Sundowns neBafana, uTeboho Mokoena, obedlala umdlalo ka-50 eqenjini lesizwe.