OweDRC ubona benethuba lokudlula kwiNigeria

UKHOLWA wukuthi iqembu lakhe lingaphuma phambili uma selibhekene neNigeria kowamanqamu womqhudelwano wokuhlungela iNdebe yoMhlaba umqeqeshi weDemocratic Republic of Congo, uSebastien Desabre.

Lo mdlalo uzoqala ngo-9 ebusuku eStade Prince Héritier Moulay El Hassan, eRabat, eMorocco.

ISuper Eagles ingene lo mqhudelwano kulandela ukuqeda isibili kuGroup C esigabeni samaqoqo sokuhlunga. Kuleli qoqo kuqhwakele iBafana bafana, yasheshe yazitholela ithikithi elibheke e-United States, Mexico naseCanada.

INigeria ibe isinqoba iGabon ngo 4-1 kowandulela owamanqamu walo mqhudelwano omncane eRabat ngoLwesine.

Iqembu lika-Eric Chelle lihambe phambili ngegoli lika-Akor Adams ngasekupheleni kwesiwombe sesibili, iGabon yalinganisa ngelikaMario Lemina umdlalo usuyophela.

Kuthe kwi-extra time uChidera Ejuke waphinde wayibeka phambili iNigeria, ngaphambi kokuthi uVictor Osimhen aqinisekise umphumela ngamagoli amabili.

IDR Congo ibe yingxenye yalo mqhudelwano ngokulala endaweni yesibili kuGroup F, lapho kudlule khona i-Ivory Coast.

Kowandulela owamanqamu obungoLwesine ebusuku iguqise iCameroon ngo 1-0 ngegoli elishaywe nguChancel Mbemba umdlalo usuyophela.

Umqeqeshi weDRC uSebastien Desabre ubona ezakhe zinethuba lokudlulela phambili ziyomela i-Afrika emqhudelwaneni ozodlalwa phesheya ngonyaka ozayo ozocacisa ukuthi yimaphi amaqembu amabili azozibekisela izindawo eNdebeni yoMhlaba.

“Sinqobe iqembu leCameroon elisezingeni eliphezulu. Kufanele sizame ukuphumula ukuze silungele umdlalo olandelayo. Sidinga ukuzithoba ngoba sisazodlala nelinye lamazwe ahlinishwayo e-Afrika, iNigeria,” kusho uDesabre.

“Lawa ngamaqembu angaphambili kwethu uma kuqhathaniswa izindawo esikleliswe ngazo ngokweFifa. Siyazi ukuthi iqembu lethu lisathuthuka, liya phambili. Sithathhe igxathu elibalulekile kulo mdlalo futhi sinethuba lokukhombisa ukuthi singobani uma sesibhekene neNigeria.”