IChiefs ethubeni lokubamba iPirates kwiDiski
IPHINI lomqeqeshi weKaizer Chiefs kwiDStv Diski Challenge, uDillon Sheppard, okufanele liqhamuke namaqhinga okuvimba i-Orlando Pirates abazobhekana nayo eSolomon Mahlangu Stadium, eKaNyamazane, ngeSonto
Image: Backpagepix
I-KAIZER Chiefs izothwala amathemba amaqembu asezithendeni ze-Orlando Pirates emjahweni weligi yeDStv Diski Challenge uma lezi zinkunzi seziqhuthana eSolomon Mahlangu Stadium, KaNyamazane, ngeSonto.
Lo mdlalo ungomunye wedili lemidlalo emine ezodlalelwa eMpumalanga, ngoMgqibelo nangeSonto. IChiefs engompetha bangesizini edlule beDiski, idonsa kanzima njengoba okwamanje ingabalwa namaqembu asethubeni lokuwina isicoco. Isendaweni yesithupha kwi-log ngamaphuzu angu-14 emidlalweni engu-10. Isele ngawu-11 kwiPirates esesicongweni ngawu-25 emidlalweni engu-10. IMamelodi Sundowns esendaweni yesibili ngamaphuzu angu-20 neStellenbosch ekweyesithathu ngawu-19, yiwona amaqembu ajaha iPirates ebukeka ishosholoza ngaphansi kobuholi bomqeqeshi uRoscoe Krieling. Ukuqhubeka nokucosha amaphuzu kweZimnyama kuzibeka ethubeni lokuwina isicoco seligi, iqede ishobolo leminyaka kwazise azikaze ziyiwine selokhu yasungulwa iDiski ngo-2014.
Akubuzwa ukuthi iSundowns neStellies bazothembela kwiChiefs ukuthi ivimbe iPirates ingalinwebi igebe lamaphuzu esicongweni ukuze bezosala benalo ithuba lokuyibamba. IPirates isahlulwe yiPolokwane City kuphela kule sizini, yadlala ngokulingana neDurban City emdlalweni wokuvula wesizini. Ngaphandle kwalokho, iqhobozela kwasani okuphambi kwayo njengoba iyiwinile imidlalo eyisishiyagalombili.
ISundowns neStellies yibona abazovula idili lemidlalo eSolomon Mahlangu Stadium ngoMgqibelo ngo-12 emini. Ukunqoba kweSundowns kungasho ukunciphisa igebe lamaphuzu phakathi kwayo nePirates. Ukudlala ngokulingana kwala maqembu kungayibeka ebuhleni iPirates ikakhulukazi uma iphumelela ukushaya iChiefs ngeSonto.
Imidlalo yeDStv Diski Challenge:
NgoMgqibelo:
Stellenbosch FC v Mamelodi Sundowns (Solomon Mahlangu Stadium, 12pm); TS Galaxy v Orbit College (Solomon Mahlangu Stadium, 3pm); Marumo Gallants v Siwelele (Dr Molemela Stadium, 10am); Durban City v Chippa United (Chatsworth Stadium, 12pm); Golden Arrows v AmaZulu (Sugar Ray Xulu Stadium, 12pm)
NgeSonto:
Polokwane City v Magesi (Solomon Mahlangu Stadium, 12pm); Kaizer Chiefs v Orlando Pirates (Solomon Mahlangu Stadium, 3pm); Richards Bay v Sekhukhune United (Princess Magogo Stadium, 10am);