Awase-Afrika azobanga indawo kowokuhlungela eyoMhlaba
UKAPUTENI weNigeria uWilliam Troost-Ekong nomgadli uVictor Osimhen.
Image: BACKPAGEPIX
AMAZWE amane ase-Afrika, iNigeria, Cameroon, Gabon neDemocratic Republic of Congo, azolwela ukugcina amathemba awo okufinyelela eNdebeni yoMhlaba yangonyaka ozayo uma esebhekene emqhudelwaneni okhethekile ozoba seMorocco kuleli khefu leFifa.
ICameroon iyona enomlando omkhulu eNdebeni yoMhlaba kwazise isidlale kulo mqhudelwano amahlandla ayisishiyagalombili phambilini, okuhlanganisa ngo-1990 lapho yaba yiqembu lokuqala lase-Afrika elifinyelele kuma-quarterfinal.
I-Indomitable Lions yagcina ukudlala kulo mqhudelwano eQatar ngo-2022.
INigeria isidlale eNdebeni yoMhlaba izikhawu eziyisithupha, kanti yagcina ukubonakala emqhudelwaneni owawuseRussia ngo-2018.
IDemocratic Republic of Congo isadlale kanye kulo mqhudelwano, okwenzeka ngo-1974 isaziwa ngeZaire. IGabon isabheke ukungena kuwona okokuqala ngqa.
La mazwe amane azibekisele izindawo kulo mqhudelwano wokuhlunga ngokuqeda endaweni yesibili kangcono emaqoqweni awo.
INigeria izobhekana neGabon eMoulay Hassan Stadium, eRabat, namuhla ngo-6 ntambama.
ICameroon izodudulana neDR Congo e-Al-Barid Stadium ngo-9 kusihlwa.
Amaqembu azonqoba azohlangana ngeSonto lapho kuzophuma khona elilodwa lase-Afrika elizodlala emqhudelwaneni wokugcina wokuhlunga ngoMashi.
Lo mqhudelwano wokugcina uzokhiqiza amaqembu amabili azozibekisela indawo eNdebeni yoMhlaba ezodlalelwa e-United States, Mexico naseCanada ngonyaka ozayo.
Iqembu elizomela i-Afrika lizoqhudelana neBolivia (CONMEBOL), New Caledonia (OFC), kanye namaqembu ase-Asia neConcacaf.
NgoLwesibili kubikwe ukuthi abadlali nezikhulu zaseNigeria banqabile ukuzilolonga ngenxa yemali osekunesikhathi bengayikhokhelwa.
Nokho, izinto ziphinde zalunga izolo iqembu laqhubeka nokulungiselela lo mdlalo omqoka neGabon.
Ukaputeni weSuper Eagles, uWilliam Troost-Ekong, uthe abadlali bayazi ukuthi kubaluleke kangakanani ukuthi balwele ukuya eNdebeni yoMhlaba.
"Angicabangi ukuthi kufanele ngibachazele ukuthi kusho ukuthini kodwa ngibatshelile ukuthi kwakunjani ngesikhathi sigcina ukudlala kulo mqhudelwano. Ngikulambele kakhulu ukubuyela kulo mqhudelwano namaqembu ahamba phambili emhlabeni jikelele. Siyabuqonda ubunzima bale midlalo yokuhlunga," kusho uTroost-Ekong ekhasini i-Ademola Victor TV kwiYouTube.
“Ngicabanga ukuthi kusho lukhulu nakubadlali abasebancane abafuna ukuzakhela igama futhi abahlose ukuzuza okuthile neNigeria.
"Sekuphele iminyaka engaphezu kwemibili selokhu saqala lolu hambo lokuzama ukuzibekisela indawo eNdebeni yoMhlaba. Sifuna ukulisebenzisa ngokuphelele leli thuba esinalo."