Golden Arrows (0)2
Marumo Gallants (0)2
IGallants inqobe ngo 4-2 kumaphenathi.
ASHABALELE amaphupho eKwaZulu-Natal okuba neqembu emdlalweni wamanqamu weCarling Knockout kulandela ukukhishwa kweLamontville Golden Arrows kowandulela owamanqamu eKing Zwelithini Stadium, eMlaza, izolo ntambama.
Amagoli eGallants ashaywe nguNdabayithethwa Ndlondlo noChristopher Sithole esiwombeni sesibili. Awe-Arrows ebekwe enethini ngu-Isaac Cisse noNqubeko Dlamini kusona lesi siwombe.
I-Arrows beyize kulo mdlalo ishayela phezulu kulandela ukubhubhudla kwayo iGallants ngo 4-0 emdlalweni weBetway Premiership phakathi nesonto eledlule. Ukuhlulwa kwayo kulandele ukukhishwa kweRichards Bay FC yi-Orlando Pirates ngo 1-0 komunye owandulela owamanqamu eMoses Mabhida Stadium, eThekwini, ngoMgqibelo. Ukuhlulwa kwawo womabili amaqembu kusho ukushabalala kwamaphupho eKZN okufinyelela kowamanqamu nokuqeda ishobolo leminyaka lokwehluleka ukuwina izindebe. I-Arrows yilona iqembu lokugcina elawina indebe iqukula iMTN8 ngo-2009.
Kowamanqamu, iGallants isizobhekana ne-Orlando Pirates ngoNovemba 17 enkundleni esazomenyezelwa yiPremier Soccer League (PSL). Kunamahlebezi okuthi uzodlalelwa ePeter Mokaba Stadium, ePolokwane.
Emdlalweni wayizolo, amaqembu womabili aqale umdlalo ngegiya eliphansi. Awekho amathuba aphakamisa amaphaphu ewakhile kwaze kwaba kuphela isiwombe sokuqala. Nokho esesibili besihluke kakhulu kwazise i-Arrows neGallants baqalile ukuhlaselana. Kusheshe kwayilungela i-Arrows ngomzuzu ka-53 ngesikhathi uCisse eqedela ibhola ebelivinjwe ngunozinti weGallants, uWashington Arubi kukade kuyikhona eshaywe nguSibonelo Cele. Emuva kwemizuzu emibili, uNdlondlo udonse umngundatshani weshodi esemgqeni webhokisi, lamudla uXolani Ngcobo obevimbele Abafana Bes'thende. Emuva kwaleli goli, bekungathi i-Arrows iyabuya kodwa yangenelwa ngelinye igoli elishaywe ngobuchule nguChristopher Sithole weGallants ekude. Sekusele imizuzu engu-20 kuphele umdlalo, uDlamini ushayele i-Arrows igoli lesibili. Imizamo ye-Arrows yokushaya igoli lokuwina igcine ingaphumelelanga nasesikhathini esengeziwe, kwagcina kuyiwe kumaphenathi.
Related Topics: