Kuzohlangana eyazanayo koweBay nePirates kwiCarling
KUBHEKWE amagoli kumgadli weRichards Bay FC osemnkantshubomvu owake wagijima kwi-Orlando Pirates, uGabadinho Mhango
Image: BACKPAGEPIX
KUNGENZEKA iRichards Bay FC ne-Orlando Pirates bahlome ngabadlali asebeke bagqoka imifaniswano yezimbangi njengoba bezohlangana kowandulela owamanqamu weCarling Knockout eMoses Mabhida Stadium namuhla ngo-3 ntambama.
INatal Rich Boyz kubhekwe ukuthi igadle ngomakadebona uGabadinho Mhango, owagijima kweZimnyama kusukela ngo-2019 kuya ku-2022.
Lo mdlali ofike kuleli qembu kule sizini esuka kwiMarumo Gallants, useshaye amagoli amane selokhu kuqale isizini, okuhlanganisa amabili awashaye emidlalweni yakamuva yeligi bebhekene nePolokwane City neSekhukhune United.
EzikaMagebhula zingase ziqalise umgadli osemncane uYanela Mbuthuma, ezimthathe kwiBay ngaphambi kokuqala kwale sizini.
Naye useyibhakuzise kane inethi kule sizini futhi uzofika eshisa kwazise uhlohle amagoli amabili koweBetway Premiership phakathi nesonto benqoba iLamontville Golden Arrows ngo 3-1.
Ngaphandle kukaMbuthuma, iPirates inomunye umdlali osuka kwiNatal Rich Boyz oyibamba emuva ngakwesokunxele, uNkosikhona Ndaba, elisuke kuyena ibhola elibe wumkhonto ogwaze ekhaya ka-Ayanda Jiyane ngesikhathi leli qembu lase-Orlando linqoba i-Arrows.
UYANELA Mbuthuma kungenzeka abe wuhlupho eqenjini lakhe lakudala uma i-Orlando Pirates isibhekene neRichards Bay FC kowandulela owamanqamu weCarling Knockout
Image: BACKPAGEPIX
“Siwubheke ngabomvu lo mdlalo siyithimba labaqeqeshi, kanjalo nabadlali. Iningi labo alikanqobi zindebe, ngakho-ke leli yithuba lokuthi badlulele kowamanqamu,” kusho umqeqeshi weBay, uRonnie Gabriel.
“IPirates inenqwaba yabadlali abashisayo, kodwa sikholwa wukuthi singakwazi ukumelana nayo. Kufanele sisebenzise ubuhlakani ukuze nabadlali banyukelwe wukuzethemba.
"Abadlali abanqobise iPirates idlala ne-Arrows, uMbuthuma noNdaba, basuka kithina. Lokho kukhombisa ukuthi siyakwazi ukukhiqiza abadlali. Sinabo abaseqenjini lethu njengamanje esibheke ukuthi bakhuphukele kwelinye izinga."
Umqeqeshi wePirates, u-Abdeslam Ouaddou, unolwazi oluningi ngoMhango, kwazise uke wamcija kwiGallants ngesizini edlule.
“Kufanele silihloniphe iqembu esizodlala nalo. Uma iRichards Bay idlulela kowamanqamu kuyobe kuchaza ukuthi iyiqembu elinabadlali abayingozi. Imidlalo yomkhumulajezi ihlukile kakhulu,” kusho u-Ouaddou.
“Singakhuluma ngamaqhinga kodwa kudingeka okunye okuthe xaxa. Imidlalo yalolu hlobo idinga ubuqhawe, nokuyinto esithemba ukuthi sizoyikhombisa enkundleni.
“Silindele ukubhekana neqembu elizobe lizimisele. Siyabazi abadlali balo, okubalwa kubona umdlali engisebenze naye ngesizini edlule (uMhango).”
Kuzovuka amagqubu kulo mdlalo kwazise iBay yazikhipha ezikaMagebhula kuma-quarterfinal eCarling ngo-2023, izinqoba ngo 5-4 sekukhahlelwa amaphenathi.
Iqembu elizonqoba namuhla lizozibekisela indawo kowamanqamu lapho lizobhekana khona nelizodlula phakathi kweLamontville Golden Arrows neMarumo Gallants abazodlala eKing Zwelithini Stadium, eMlaza, kusasa ngo-3 ntambama.