I-ORLANDO Pirates iwendlalele ngokuxebula iLamontville Golden Arrows umdlalo owandulela owamanqamu weCarling Knockout ezowugijima neRichards Bay ngoMgqibelo eMoses Mabhida Stadium, eThekwini.
IPirates yehlule i-Arrows ngo 3-1 emdlalweni weBetway Premiership eKing Zwelithini Stadium, eMlaza, ngoLwesithathu ebusuku. Amagoli eZimnyama kube womkhonto ogwaze ekhaya ka-Ayanda Jiyane esiwombeni sokuqala namabili abekwe enethini nguYanela Mbuthuma kwesesibili. ElaBafana Bes'thende livalelwe phakathi nguThokozani Khumalo.
Amaphuzu amathathu atholwe yiPirates ayinyusele endaweni yesibili kwi-log yePremiership lapho isibambene khona neKaizer Chiefs ngawu-22. EZimnyama zingaphezulu ngenxa yokuba namagoli amaningi kunaMakhosi. Esicongweni kusahlezi iMamelodi Sundowns esinawu-25 kulandela ukwehlula kwayo iTS Galaxy ngo 1-0 eLoftus Versfeld Stadium, ePitoli.
Emuva komdlalo, umqeqeshi wePirates u-Abdeslam Ouaddou, uncome abadlali bakhe ngendlela abayincishe ngayo umoya i-Arrows.
"Ngiyababongela abafana bami, baqale umdlalo ngayo ngqo indlela ebesifuna ukuqala ngayo umdlalo. Besifuna ukubacindezela phambili ngesivinini, sidlale ibhola elihle. Besifuna ukucindezela abadlali babo abane basemuva kodwa futhi sibe baningi phakathi nendawo. Kusebenzile lokhu futhi sisheshile ukuthola igoli. Kodwa bekubalulekile kimina ukungavumeli leli qembu lidlale ngoba banomqeqeshi omuhle, asikusho lokho. Bayiqembu elihle, uma ubavumela bedlale bengakufaka enkingeni. Ngakho inhloso bekuwungabavumeli baphefumule futhi ngicabanga ukuthi kusisebenzele,"kusho u-Ouaddou kwiSupersport.
IPirates izoqhubeka nokukhempa eThekwini kwazise ngoMgqibelo ngo-3 ntambama izobhekana neBay kowandulela owamanqamu eMoses Mabhida Stadium. Lo mdlalo ngowamagqubu kwazise iNatal Rich Boys iyona ekhiphe iPirates kulo mqhudelwano ngesizini edlule.
Isiyonke imiphumela yemidlalo yeBetway Premiership
Golden Arrows 1-3 Orlando Pirates; Mamelodi Sundowns 1-0 TS Galaxy; Durban City 1-0 Marumo Gallants; Stellenbosch 0-2 Siwelele
Related Topics: