Anciphile angakahlulwa kwi-UEFA Champions League
UMDLALI weBayern Muncih uLuis Diaz ushaye amagoli amabili waphinde wakhishwa ngekhadi elibomvu beguqisa iParis Saint Germain ngo 2-1 emdlalweni we-UEFA Champions League.
Image: FACEBOOK
SEHLILE isibalo samaqembu angayazi induku kwi-UEFA Champions League kulandela ukunqotshwa okokuqala kweReal Madrid neParis Saint Germain esigabeni samaqoqo ngoLwesibili ebusuku.
IMadrid iguqiswe yiLiverpool e-Anfield ngegoli elibekwe enethini ngekhanda ngu-Alexis Mac Allister esiwombeni sesibili.
Leli qembu laseMerseyside lingqongqoze kaningi ebhokisini leMadrid kodwa lifike livinjwe ngunozinti uThibaut Courtois, ngaphambi kokuthola leli goli ngomzuzu ka-61.
Lo mdlalo ububhekwe ngabomvu ngenxa yokubuya kukaTrent-Alexander Arnold, oshiye iLiverpool wajoyina iMadrid ngoJuni.
Lo mdlali ungene umdlalo usuyophela wangenza minyakazo etheni, kodwa njalo uma ephethe ibhola abalandeli beLiverpool bebebanga umsindo bekhombisa ukungamjabuleli yize adlala iminyaka kuleli qembu.
Ompetha iPSG nabo balahle amaphuzu okokuqala kule sizini begotshwa yiBayrn Munich ngo 2-1 eParc de Princes, eParis.
ULuis Diaz ushaye amagoli amabili esiwombeni sokuqala ngaphambi kokuthi akhishwe ngekhadi elibomvu sekuzoyiwa ekhefini.
UJoao Neves ushayele iPSG igoli kwesesibili kodwa yahluleka ukuthola okokulinganisa yize ibisiwuphethe umdlalo.
Kweminye imidlalo, i-Arsenal iqhubekile nokushosholoza iqumba phansi iSlavia Praha ngo 3-0, iTottenham Hotspur ixebule iFC Copenhagen ngo 4-0, i-Atletico Madrid yanqoba i-Union Saint-Gilloise ngo 3-1, kwathi i-AS Monaco yaguqisa iBodo/Glimt ngo 1-0.
Eminye imidlalo iphelele zilingana njengoba iNapoli ibambene ngo 0-0 ne-Eintracht Frankfurt, i-Juventus neSporting CP bedlale u 1-1, kwathi iPSV Eindhoven ne-Olympiakos nabo babambana ngo 1-1.
Umdlalo obhekwe ngabomvu ngoLwesithathu ebusuku uzobe uphakathi kweManchester City neBorussia Dortmund ozoqala ngo-10 ebusuku e-Etihad Stadium lapho umgadli weCity, u-Erling Haaland, ezophinde abhekane khona neqembu lakhe lakudala.
Imidlalo ye-UEFA Champions League yangoLwesithathu ebusuku
7.45pm - Qarabag FK v Chelsea, Pafos v Villarreal
10pm - Manchester City v Dortmund, Newcastle United v Athletic Club, Ajax v Galatasaray, Club Brugge v Barcelona, Benfica v Bayer Leverkusen, Inter Milan v Kairat, Marseille v Atalanta.