IKAIZER Chiefs inyukele endaweni yesibili kwi-log yeBetway Premiership emuva kokuzidlela amahlanga kwi-Orbit College eFNB Stadium, eNasrec, ngoLwesibili ebusuku.
Amagoli aweze Amakhosi ashaywe nguMduduzi Shabalala amabili, Mfundo Vilakazi noFlavio Da Silva ngokwahlukana kweziwombe kulo mdlalo awunqobe ngo 4-1. Elokubika ekhaya le-Orbit lishaywe ngu-Ayanda Lukhele esuka ebhentshini esiwombeni sesibili.
UShabalala ugcine eqokwe njengomdlali ovelele kulo mdlalo obuhanjelwe ngumqeqeshi weBafana Bafana, uHugo Broos, nephini lakhe uHelman Mkhalele. Kusasa, uBroos uzomemezela isikwati seBafana esizodlala umdlalo wobungani neZambia ngoNovemba 14.
Ukunqoba kweChiefs kuyenyusele endaweni yesibili kwi-log yePremiership, yabambena neMamelodi Sundowns ngamaphuzu angu-22. Amakhosi angemuva kweSundowns ngenxa yokuthi leli qembu lasePitoli linamagoli amaningi.
IChiefs ibivele ifike emdlalweni we-Orbit ishayela phezulu kulandela ukubuya namaphuzu amathathu kwiDurban City emdlalweni ewunqobe ngo 1-0 wegoli likaDa Silva eThekwini ngoLwesihlanu. Indlela eqale ngayo kowe-Orbit ikhombisile ukuthi izimisele ukuqhubeka nalowo mgqigqo, kubhoke kakhulu u-Asanele Velebayi obenikwe ithuba lokuqala umdlalo okokuqala eNaturena. Nakuba iChiefs ihlulekile ukusebenzisa amathuba amaningi ewatholile, ikakhulukazi esiwombeni sesibili kodwa umqeqeshi, uCedric Kaze usale enelisekile ngendlela abafana bakhe abadlale ngayo.
"Besilokhu sidlala kahle kodwa sihluleka ukuqedela amathuba esiwakhayo.Namuhla bekubalulekile ukuqala kahle, siqale ngomqondo omuhle. Njengoba ngishilo emasontweni adlule, uma silokhu sidlala kahle amagoli azoqhamuka. Ngiyajabula ukuthi sishaye amane namuhla, sathola namaphuzu amathathu,"kusho uKaze kwiSupersport.
IChiefs izobuyela enkundleni ngoNovemba 22 isiyobhekana neMagesi FC emdlalweni weligi eSeshego Stadium, ePolokwane.
Related Topics: