Amajimbos avule ngewini kweyoMhlaba
U-EMILE Witbooi oshayele Amajimbos igoli lokuqala enqoba iBolivia ngo 3-1 kowokuvula iNdebe yoMhlaba.
Image: X / FIFA WORLD CUP
LIVULE ngokuqoqa amaphuzu aphelele eNdebeni yoMhlaba iqembu lesizwe labafana lika-Under-17, liguqisa iBolivia ngo 3-1 e-Aspire Zone Pitch 3, eDoha, Qatar, izolo ntambama.
Amagoli Amajimbos ashaywe ngu-Emile Witbooi, Neo Bohloko noShaun Els ngokwehlukana kweziwombe. EleBolivia liqhamuke kuJesus Maraude kwesesibili.
Iqembu lakuleli lilahlekelwe ngumdlali ngomzuzu ka-36 ngesikhathi isitobha sawo, uSive Pama, sikhishwa ngekhadi elibomvu kulandela ukudlalisa kabi umgadli weBolivia, uJairo Saldias.
Nokho, lokho akuwadikibalisanga Amajimbos njengoba egadle kuqala eseshoda ngomzuzu ka-38. Ishodi lika-Emile Witbooi lishaye epalini laphinde labuyela kuyena, walivalela phakathi.
Elesibili libekwe enethini nguNeo Bohloko eqhamuka ngakwesokunxele, ehlangana nebhola elihle ebeligotshwe ngu-Alwande Booysen.
Kube sengathi izama ukubuya iBolivia ithola igoli ngomzuzu ka-72 ngephenathi kaJesus Maraude ngemuva kokuthi kudlaliswe kabi uSantos Garcia ebhokisini.
Amajimbos aphinde alivula igebe ngesikhathi esengezwe ngunompempe. UBooysen, ongene neminyakazo emihle esiwombeni sesibili, ushiye isitobha seBolivia silele phansi ngakwesokudla, waligobela u-Els, olibeke phakathi ezihambela yedwa.
Iqembu likaVela Khumalo selizobhekana nosokhaya, iQatar, ngoLwesine ngo 5.45 ntambama ngaphambi kokusonga eyamaqoqo ne-Italy ngeSonto ngo-5.45 ntambama.
Amajimbos adlala okwesibili eNdebeni yoMhlaba. Ngesikhathi edlala okokuqala ngo-2015, aqeda emsileni eqoqweni lawo ngephuzu.