UKgatlana ubuye wafaka iBanyana kwiWafcon

UMGADLI weBanyana Banyana, uThembi Kgatlana, ushaye igoli elifake iqembu lakuleli kwiWomen's Africa Cup of Nations yangonyaka ozayo ngesikhathi linqoba iDemocratic Republic of Congo ngo 1-0 eDobsonville Stadium, eGoli. 

Iqembu lakuleli lidlule ngo 2-1 uma sekuhlanganiswe imilenze yomibili kwazise umlenze wokuqala uphele zibambene ngo 1-1 eKinshasa ngesonto eledlule.

UKgatlana ubedlala okokuqala eqenjini lesizwe selokhu agcina ngo-Ephreli. Wakhetha ukungayidlali iWafcon yanonyaka ngoJulayi ngenxa yezizathu ezithinta yena, kanti ubengekho eqenjini eliye eDRC ngesonto eledlule.

Yena nabanye abadlali abazinze emexico, uHildah Magaia, Sinoxolo Cesane no-Amogelang Motau, bafikele kuleli iqembu selivele liseDRC.

Ulibekile ibhola enethini esiwombeni sokuqala ehlangana neshodi ebelishaywe nguMagaia, kodwa igoli laphikwa kuthiwa uKgatlana ubesemhlabeni ongamfanele. 

Kugcine kulungile ngesikhathi esengezwe ngunompempe esiwombeni sesibili ngesikhathi uKgatlana entshontsha ibhola ezinyaweni zesitobha seDRC, wadlulisa esinye ngomjiko ngaphambi kokulinamathisela enethini ibhola. 

Ukungena kweBanyana kwiWafcon ezodlalelwa eMorocco ngonyaka ozayo kusho ukuthi isethubeni lokubalwa bamaqembu amane azophuma kulowo mqhudelwano azibekisele izindawo eNdebeni yoMhlaba ezoba seBrazil ngo-2027.