Kusemahlombe kaMbuli ukufaka iBanyana kwi-Wafcon
UTHINASONKE Mbuli obambe izintambo kwiBanyana Banyana njengoba izobhekana neDemoractic Republic of Congo kowokuhlungela iWafcon.
Image: BACKPAGEPIX
IJOKA lokufaka iqembu lesizwe lebhola labesifazane kwi-Women’s Africa Cup of Nations lisemahlombe omqeqeshi osabanjisiwe, uThinasonke Mbuli.
IBanyana izotholana phezulu neDemocratic Republic of Congo eDobsonville Stadium, eGoli, namuhla ngo-7 ebusuku emlenzeni wesibili womzuliswano wokugcina wokuhlungela iWafcon.
Umlenze wokuqala obuseDRC ngesonto eledlule uphele zibambene ngo 1-1.
IBanyana ihambe phambili ngegoli likaKgalebane Mohlakoana, iDRC yalinganisa ngelikaRuth Monique Kipoyi.
Iqembu elizophuma phambili uma sekuhlanganiswe imilenze yomibili lizozibekisela indawo kwiWafcon ezodlalelwa eMorocco ngonyaka ozayo.
Amaqembu amane azofinyelela kweyandulela owamanqamu kulowo mqhudelwano emela izwekazi i-Afrika eNdebeni yoMhlaba ezodlalelwa eBrazil ngo-2027.
UMbuli, oseneminyaka eyiphini lomqeqeshi weBanyana, uyena obebambe izintambo emlenzeni wokuqala eDRC njengoba uDesiree Ellis engalubhadanga khona ngenxa yokuthi akakavumelani neSafa mayelana nenkontileka entsha.
Uqhubekile nokucija iqembu ngesikhathi litheleka kuleli, waphinde wahambela isithangami nabezindaba izolo ntambama, okukhombisa ukuthi amasu akhe okubhekwe ukuthi agudluze iDRC.
Njengoba iBanyana isinalo igoli lasekuhambeni, ingazifaka kwi-Wafcon uma lo mdlalo wakusihlwa uphela zibambene ngo 0-0.
Nokho, ukubuya kwabadlali abebengekho emlenzeni wokuqala, uThembi Kgatlana, Hildah Magaia, Amogelang Motau noSinoxolo Cesane kusho ukuthi iqembu lizoqina phambili.