Injejane yaseMzansi ethubeni lomklomelo omqoka e-Afrika

ABADLALI basemuva abasebancane, uMbekezeli Mbokazi kanye noTylon Smith,  bazophephezelisa ifulegi lesizwe njengoba beqokelwe indondo yeYoung Player of the Year kumaCaf Awards anonyaka.

Laba badlali bafakwe kulo munxa ngenxa yokugqama emaqenjini abo nasemaqenjini esizwe kulo nyaka.

UMbokazi, 20, oyibamba emuva kwi-Orlando Pirates, ube nonyaka omuhle. Selokhu ekhushulelwe eqenjini elikhulu ngoMashi akabange esabheka emuva. Ukuzimisela nobuholi bakhe bumenze washeshe waba yisilomo kubaqeqeshi nakubalandeli beZimnyama.

Indlela adlale ngayo emiqhudelwaneni yasekhaya neyezwekazi iholele ekutheni umqeqeshi weBafana Bafana, uHugo Broos, amfake eqenjini lesizwe elikhulu. UBroos usesho kaningi ukuthi lo mdlali kumfanele ukudlala kumaligi amakhulu phesheya kwezilwandle.

USmith naye oneminyaka engu-20, ujoyine iqembu lase-England iQueens Park Rangers ngoJulayi nonyaka esuka kwiStellenbosch FC. Ekupheleni kwesizini edlule uqokwe njengomdlali ovelele kwiDStv Diski Challenge.

Ubeseqenjini lakuleli lika-Under-20 elinqobe i-Africa Cup of Nations ka-Under 20 ngoMeyi. Kulo mqhudelwano uqokwe njengomdlali ovelele. Ngaphezu kwalokho, udlalele Amajita kwiNdebe yoMhlaba esanda kusongwa eChile. 

Phakathi kwabadlali base-Afrika asebeke bathola indondo yeCaf Young Player of the Year kubalwa izinkakha uSamuel Eto'o, Didier Drogba, Emmanuel Adebayor noYaya Touré, bonke abakhula benza ezibukwayo kumaligi aphezulu e-Europe.

Kwabasanda kuthola lo mklomelo kubalwa uVictor Osimhen, Alex Iwobi, Achraf Hakimi, Pape Matar Sarr noLamine Camara, nabo abadlalela amaqembu aphezulu e-Europe njengamanje.

Ngisho nabanye abadlali abasanda kuqokelwa kulo munxa abagcina bangayitholanga indondo njengoKarim Konaté, Oumar Diakité, Bilal El Khannouss, Eliesse Ben Seghir no-El Hadji Malick,  nabo badlala phesheya.

Umqeqeshi wePirates, u-Abdeslam Ouaddou, uhalalisele uMbokazi ngokuba ngomunye wabadlali abazobanga lo mklomelo, wameluleka ngokuthi aqhubeke nokuzithoba.

"Yinto enhle kakhulu. Kufakazela ukuthi uma sisebenza nsuku zonke, silandela indlela eqondile yokuphila futhi sinakekela imizimba yethu, imiphumela iyavela. Kusho lukhulu kuyena naseqenjini,” usho kanje u-Ouaddou.

"Akumele sikhohlwe wukuthi usimele sonke futhi ngiyaziqhenya ngaye njengoba nami ngangidlala emuva. Ngingameluleka ngokuthi aqhubeke nokuzethemba, azithobe futhi aqhubeke nokusebenza ngoba izinto ziguquka ngokushesha ebholeni. Ungakhuphuka ngokushesha kodwa futhi ungawa ngendlela efanayo. Uma ulihlonipha ibhola nalo lizokuhlonipha." 

IQueens Park Rangers nayo imhalalisele uSmith emakhasini ayo ezinkundleni zokuxhumana.

Abanye bakuleli abaqokiwe ngunozinti uRonwen Wiliams osemunxeni weGoalkeeper of the Year, iMamelodi Sundowns, Orlando Pirates neStellenbosch FC abasembangweni weTeam of the Year, neBafana Bafana esemunxeni weNational Team of the Year.

Umcimbi wamaCaf Awards uzoba seMarrakech, eMorocco, ngoDisemba.