Ithemba iBanyana ibambana neDRC kowokuhlungela iWafcon
ISITOBHA seBanyana Banyana uKarabo Dhlamini sidudulana nomgadli weDemocratic Republic of Congo uRuth Monique Kipoyi emdlalweni wokuhlungela iWafcon ngoLwesithathu .
Image: FACEBOOK
IBanyana Banyana izishiyele umsebenzi kweyokuhlungela iWomen’s Africa Cup of Nations yangonyaka ozayo, ibambana ngo 1-1 neDemocratic Republic of Congo emlenzeni wokuqala womzuliswano wokugcina wokuhlungela lo mqhudelwano.
Lo mdlalo ububanjelwe ePentecost Martyrs Stadium, edolobheni iKinshasa, eDemocratic Republic of Congo.
IBanyana ingelinye lamaqembu angawudlalanga umzuliswano wokuqala, yangena kowesibili ihambisana neNigeria, Zambia, Ghana, Cameroon ne-Ivory Coast.
IDRC yanqoba iBotswana ngo 2-0 emzuliswaneni wokuqala ngoFebhuwari nonyaka.
Iqembu lakuleli liye emdlalweni wayizolo bengekho abadlali abazinze eMexico, uThembi Kgatlana, Hilda Magaia, Sinoxolo Cesane no-Amogelang Motau, okuvele ukuthi bazolijoyina kuleli ngaphambi komlenze wesibili.
Phezu kwalokho, izintambo bezibanjwe yiphini lo mqeqeshi, uThinasonke Mbuli, njengoba uDesiree Ellis engakayisayini inkontileka entsha.
IBanyana ihambe phambili ngomzuzu ka-42 ngesikhathi uBonolo Mokoma entshontsha ibhola ngaphandle kancane kwebhokisi, waligobela uKgalebane Mohlakoana olibeke phakathi ngebatha.
Nokho, kuyiwe ekhefini la maqembu eselingana kulandela igoli leDRC elibekwe enethini nguRuth Monique Kipoyi eqhamuka ngakwesokudla ebhokisini ngomzuzu ka-45.
Womabili amaqembu ahlulekile ukwengeza amagoli esiwombeni sesibili, umdlalo waphela zibambene ngo 1-1.
Ukushaya igoli ekuhambeni kweBanyana kwenza ibe sesimweni esingcono njengoba ingadlulela phambili uma umlenze wesibili ozodlalelwa eFNB Stadium, eNasrec, ngoLwesibili ungaphela ngo 0-0.
Kodwa ukuze iqinisekise ukuthi izenzela izinto zibe lula kuzodingeka ukuthi ishaye amanye amagoli ekhaya.
Iqembu elizonqoba uma sekuhlanganiswe imilenze yomibili lizozibekisela indawo kwiWafcon ezodlalelwa eMorocco ngonyaka ozayo.
Lo mqhudelwano uzophinde usetshenziselwe ukukhipha amazwe amane azomela izwekazi i-Afrika eNdebeni yomhlaba ezobanjelwa eBrazil ngo-2027.
IBanyana ayikaze ihluleke ukungena kwi-Wafcon selokhu yadlala okokuqala kulo mqhudelwano ngo-1995. Yagcina ngo-2004 ukungabalwa namaqembu amane ahamba phambili e-Afrika.