IBafana isithembele kwiNigeria kweyokuhlungela eyoMhlaba
UMDLALI weZimbabwe uKhama Billiat ebanga ibhola noweBafana Bafana, uMohau Nkota eMoses mabhida Stadium izolo ebusuku.
Image: BACKPAGEPIX
IBAFANA Bafana isizodinga ukusebenzisa izibalo ukuze ingene eNdebeni yoMhlaba kulandela ukuhluleka kwayo ukunqoba iZimbabwe emdlalweni wokuhlunga izolo ebusuku.
Lo mdlalo obuseMoses Mabhida Stadium iqembu lakuleli ebelidinga ukuwunqoba ukuze liye kowokugcina kuGroup C lisanethuba elihle lokungena kweyoMhlaba uphele zibambene ngo 0-0.
Ukunqoba kweBenin ngo 1-0 emdlalweni wayo neRwanda obuse-Amahoro Stadium, eKigali, kushiye leli qembu selizihambela lodwa esicongweni ngamaphuzu angu-17.
IBafana isendaweni yesibili ngamaphuzu angu-15 kanti iNigeira, enqobe iLesotho ngo 2-1 ePeter Mokaba Stadium, isendaweni yesithathu ngamaphuzu angu-14.
IRwanda, elele isine ngamaphuzu angu-11, ngeke isakwazi ukudlula, kanjalo neLesotho enamaphuzu ayisishiyagalolunye, neZimbabwe enamaphuzu amahlanu.
IZimbabwe yenze njengoba ibithembisile ngaphambi komdlalo eMabhida, ingaliniki thuba iqembu lakuleli, yize ibingahlaseli kakhulu.
IBafana iwatholile amathuba kuzona zombili iziwombe, kodwa ala ukhasha unozinti weZimbabwe, uWashington Arubi, kuphinde kulamule nepali.
Kubuye ithemba lokuthi umdlalo uzovuleka ngomzuzu ka-65 ngesikhathi umakadebona weZimbabwe, uKnowledge Musona, ethola ikhadi elibomvu.
Iqembu lakuleli liqhubekile nokucindezela, bezama amashodi abadlali abanjengoLyle Foster noSipho Mbule, kodwa ibhola lingayi enethini.
Unozinti weBafana, uRonwen Williams usebenzile ngasekupheleni komdlalo evimba i-freekick ebikhahlelwe nguWalter Musona, iZimbabwe isifuna ukwenza umonakalo omkhulu eqenjini lakuleli.
Iqembu likaHugo Broos liwuqede kabi umdlalo ngesikhathi uMbekezeli Mbokazi ethola ikhadi elibomvu, okusho ukuthi uzobe engekho uma selidlala umdlalo wokugcina elidinga ukuwunqoba bese lithembela ekutheni iNigeria iguqise iBenin, noma okungenani badlale ngokulingana.
ILesotho neZimbabwe bazobhekana ePeter Mokaba Stadium, ePolokwane, ngoMsombuluko ngo-6 ntambama.
Imidlalo ezocacisa ukuthi yiliphi iqembu elizoqhwakela kuGroup C izodlalwa ngoLwesibili.
IBafana izodudulana neRwanda eMbombela Stadium, eMpumalanga, ngo-6 ntambama, iNigeria igadulisane neBenin eGodswill Akpabio Stadium, e-Uyo, ngesikhathi esifanayo.