Ele-netball nomqansa wokunqoba i-Australia

UKAPUTENI weqembu elikhulu le-netball laseNingizimu Afrika, uKhanyisa Chawane, ufuna bathathe umfutho abawuthole bedlala neNew Zealand bangene nawo ochungechungeni abazoluqala nompetha bomhlaba i-Australia.

AmaProteas namaDiamonds bazotholana phezulu emdlalweni wokuqala ozoba seRed Energy Arena, edolobheni iBendigo, e-Australia, kusasa ngo-11.30 ekuseni.

Iqembu lakuleli litheleke e-Australia ekuqaleni kwaleli sonto lisuka eNew Zealand, lapho lisanda kusonga khona uchungechunge lwemidlalo emithathu neqembu lakhona.

Yize amaProteas ehluliwe kuyona yomithathu imidlalo ayidlale namaSilver Ferns, igebe belincipha umdlalo ngamunye.

Kowokuqala anqotshwe ngo 77-51, kowesibili ngo 70-58, kowokugcina ahlulwa ngo 57-56.

Leli qembu eliphekwa nguJenny van Dyk nephini lakhe uZanele Mdodana, lizobe libheke ukwakhela kulezo zimpawu zokuthuthuka uma selibhekene nelihamba phambili emhlabeni.

“Njengeqembu singena nokuzethemba kulolu chungechunge uma sibheka indlela esidlale kahle ngayo neNew Zealand muva nje. Sikholwa wukuthi siyakhula futhi sizowuthatha lo mfutho sizame ukuqhubeka nawo kule midlalo ezayo,” kusho uChawane.

“Noma kunjalo, kufanele siqaphele ngoba sisadinga ukusebenza kanzima ukuze sifinyelele ezingeni esifuna ukuba kulona. Siyakuqonda okudingeka kithina.”

UChawane, oqale ukuhola amaProteas ngo-2024, usanda kudlala umdlalo wakhe ka-100 eqenjini lesizwe.

Uthe kuyamjabulisa ukubona iqembu likhula, ikakhulukazi njengoba libheke emiqhudelwaneni emikhulu njengamaCommonwealth Games azoba seGlasgow, eScotland, ngoJulayi ozayo neNdebe yoMhlaba ezodlalelwa eSydney, e-Australia, ngoJulayi ka-2027.

“Ukuhola leli qembu yithuba elikhethekile engingalithathi kancane, futhi ngiyaziqhenya ngendlela esesihambe ngayo ekubeni kunabadlali abasebasha kuleli zinga,” usho kanje.

"Size lapha ukuzoqhudelana futhi sizicijele amaCommonwealth Games. Akekho umdlali okufanele afike kulowo mqhudelwano ezizwa sengathi akazi ukuthi yini elindeleke kuyena."

AmaProteas asebhekane ne-Australia amahlandla angu-46 kodwa awakaze ayinqobe.

Umdlalo wesibili uzodlalwa ngoLwesithathu eWollongong ngaphambi kokuthi uchungechunge lusongwe e-Adelaide ngo-Okthoba 12.