IMidlands ethubeni lokunombela ngeGomora kwiChampionship

UKUGQAMA kokuqala kahle kwamaqembu amabili kwamathathu akhushulelwe kwiMotsepe Foundation Championship kuphoqa iMidlands Wanderers ukuba ibhukule uma isibhekene neGomora United emdlalweni weligi eHarry Gwala Stadium, eMgungundlovu, ngeSonto ngo-3 ntambama.

IGomora yaseGauteng ne-The Bees yaseMpumalanga abakhushulelwe esigabeni esiphakela iBetway Premiership besuka kwi-ABC Motsepe League ngesizini edlule, bayiqale ngezindlela ezahlukene impilo entsha okufakazelwa yizindawo abahleli kuzona.

Kunzima ukuziba ukuthi iGomora ne-The Bees kabazikhombisi izimpawu zokuba basha kulesi sigaba okuyinto ehlukile uma uqhathanisa neMidlands yaKwaZulu Natal.

I-The Bees neGomora babalwa namaqembu okuqala ayisishiyagalombili kwi-log emuva kwemidlalo emihlanu asebenqobe kuyona emibili ngokwahlukana.

Womabili la maqembu asayithole emidlalweni emibili induku kwathi kowodwa adlala ngokulingana. Lokhu kukhomba isiqalo esincomekayo kwiligi okukhona kuyona amaqembu asenesikhathi ezama ukuyiwina namanye anomlando wokuba ngawesigaba esikhulu sebhola laseMzansi.

Konke kuhle kwi-The Bees neGomora kodwa kuxoxwa indaba ehlukile kwiMidlands elele endaweni yesibili uma usuka emsileni kwi-log.

Leli qembu laseKZN linewini eyodwa emidlalweni emihlanu yeligi kanti kweminye emine likhale ngaphansi.

Kungashintsha konke lokhu kule mpelasonto kodwa konke kulele ekutheni iMidlands izenzela yona umsebenzi njengoba izokwamukela iGomora ngeSonto, eMphithi.

Iwini yeMidlands ingenza omkhulu umehluko kwazise ngaphandle kokusuka ngasemsileni we-log kodwa kungayifaka ugqozi kuphinde kuyikhumbuze ukuthi kuyifanele ukudlala kulesi sigaba.

Imidlalo yeligi kule mpelasonto imi kanje:

NgoMgqibelo

University of Pretoria v Casric Stars (Tuks Stadium, 3.30pm); Baroka FC v Milford (Mafori Mphahlele Stadium, 3.30pm); The Bees v Upington City (KaNyamazane Stadium, 3.30pm); Hungry Lions v Kruger United (Dicky Jacobs Stadium, 3.30pm); Black Leopards v Highbury (Thohoyandou Stadium, 3.30pm)

NgeSonto

Leruma Lions v Venda (Olympia Park, 3.30pm); Midlands v Gomora United (Harry Gwala Stadium, 3.30pm).