IPirates inombele ngeGalaxy isondela kwiDowns
BEZISHUKANA kanje phakathi kuka-Evidence Makgopa we-Orlando Piates noKhulumani Ndamane weTS Galaxy emdlalweni weBetway Premiership onqotshwe ngeZimnyama e-Orlando Stadium izolo ebusuku
Image: Isithombe:ORLANDO PIRATES
Orlando Pirates (1) 1
TS Galaxy (0) 0
UYABAZI ubungozi obuvamise ukuhamba nokubuswa wukusalela emuva ngemidlalo umqeqeshi we-Orlando Pirates, u-Abdeslam Ouaddou, iqembu lakhe eliqhubekile nefomu yalo emangalisayo kwiBetway Premiership ngesikhathi linqoba kwi-TS Galaxy izolo ebusuku e-Orlando Stadium, eSoweto.
Ngenxa yokungabinalo igunya lokweqiwa yisigaba sokuqala sokuhlungela esamaqoqo seCaf Champions League, imidlalo emibili yePirates yeligi ihlehlisiwe. Lokhu kuyenza isalele emuva ngemidlalo emithathu kwiMamelodi Sundowns okuyiyona eqhwakele (uma kubalwa nowayizolo). EZimnyama seziwine imidlalo eyisihlanu yePremiership ilandelana.
Ngaphambi kwalo mdlalo wayizolo, iPirates ewunqobe ngamagoli ka-Evidence Makgopa obekuyiphenathi ayishaye esiwombeni sokuqala nelikaTshegofatso Mabasa ngesesibili, u-Ouaddou ukhulume ngengozi ehamba nokubuswa wukusalela emuva ngemidlalo yeligi.
“Imidlalo osuke usele ngayo kayisho ukuthi isingamaphuzu kwazise kusuke kusafanele ungagcini ngokuyidlala kepha uyinqobe,” kusho u-Ouaddou kwiSuperSport.
“Kuyingozi ukudlala ngokubuswa wumqondo wokuthi usele ngemidlalo ngoba nakubadlali kudweba isithombe sokuthi kulula futhi kuhamba kahle.
Kusemoqka ukuyiphendula amaphuzu kuqala imidlalo esisele ngayo ngaphambi kokuyibala njengesibeka ethubeni."
Ngaphandle kwegoli likaMakgopa ngomzuzu ka-20, iPirates ibizenzela kugqame inkinga yejubane likaTsepang Moremi nelikaKamohelo Sebelebele obebukeka ekulangazelele kakhulu ukushaya igoli kwazise ubebhekene neqembu lakhe lakudala.
Kungenzeka ukuthi u-Ouaddou ukubonile lokhu, wamkhipha kwazise ubesethole nekhadi eliphuzi kulandela ukudlalisa kabi uPuso Dithejane. Indawo kaSebelebele ithathwe ngu-Oswin Appollis oqhubeke lapho obekugcine khona uzakwabo ngokuhlupha izitobha seGalaxy. Ngaphandle kuka-Appollis, izitobha zeGalaxy bezibhekene nomsebenzi wokuvimba uMabasa ongene endaweni kaMakgopa. Ngesikhathi esengezwe ngunompempe, uMabasa ugcine eyilimazile iGalaxy engqofela phakathi ibhola eligotshwe nguDeon Hotto.
IPirates izobuyela enkundleni ngeSonto ngo-6 ntambama isiyobhekana neSiwelele emdlalweni weCarling Cup e-Orlando Stadium.