Zindala zombili kowabakhaya baseMadrid
ABAGADLI be-Atletico Madrid, u-Antoine Griezmann noJulian Alvarez.
Image: INSTAGRAM
IReal Madrid izobe ihlose ukuqhubeka nomgqigqo wayo omuhle kwiLa Liga njengoba izobhekana ne-Atlético Madrid kowabakhaya baseMadrid namuhla ntambama.
Umdlalo uzoqala ngo-4.15 enkundleni ye-Atletico, i-Estadio Riyadh Air Metropolitano.
IReal iqhwakele kwi-log ngamaphuzu angu-18 emidlalweni eyisithupha, kanti i-Atlético isendaweni yesishiyagalolunye ngamaphuzu ayisishiyagalolunye.
Lona kuzobe kuwumdlalo wokuqala wabakhaya selokhu uXabi Alonso anikwa izintambo zokucija iReal ngoJuni nonyaka, kanti umqeqeshi we-Atletico, uDiego Simeone, usewudlale kaningi lo mdlalo selokhu aqala ukupheka leli qembu ngoDisemba ka-2011.
IReal izongena ishisa kwazise isayinqobe yonke imidlalo eyisithupha yeligi esayidlalile, iholwa ngumgadli uKylian Mbappé ongalibheki ipali kulezi zinsuku.
KUBHEKWE ukuthhi uVinicius Junior noKylian Mbappe baqhubeke nokuba wuhlupho ezitobheni uma sebebhekene ne-Atletico Madrid namuhla ntambama.
Image: FACEBOOK
I-Atlético ayiyiqalanga kahle isizini njengoba isanqobe imidlalo emibili, yadlala ngokulingana kathathu, yanqotshwa kowodwa.
Noma kunjalo, uzoyiqinisa idolo umlando wakamuva phakathi kwala maqembu. IReal yagcina ngo-2022 ukunqoba i-Atletico emidlalweni yeligi.
Kubadlali okubhekwe ukuthi badlale indima enkulu kulo mdlalo kubalwa uMbappé noVinícius Júnior kwiReal, kanti i-Atletico izobe ithembele kuJulián Álvarez, oshaye amagoli amathathu inqoba iRayo Vallecano koweligi ngoLwesithathu.
Womabili la maqembu alinyalelwe ngabadlali abamqoka okungalindelekile ukuthi babonakale namuhla.
Abasathintekile be-Atlético nguJose Giménez, uohnny Cardoso noThiago Almada, kanti abe Real abasaziqeqesha eceleni nguTrent Alexander-Arnold, Ferland Mendy no-Antonio Rüdiger.
"Kufanele senze isiqiniseko sokuthi abadlali bami ngomumo ngemuva komdlalo wangoLwesithathu. Sizoba nomdlalo onzima ngempela neqembu elisayinqobe yonke imidlalo yalo futhi elinenqwaba yabadlali abayingozi,” usho kanje uSimeone ekhuluma kwi-website yeqembu lakhe.
U-Alonso uthe nakuba iqembu lakhe lingakadedeli maphuzu kule sizini, lisadinga ukuthuthuka.
"Sisesigabeni sokukhula nokwakha. Kufanele siqhubeka nokukhuphula izinga kodwa sisendleni efanele. Angikhulumi ngemiphumela kuphela kodwa nendlela esenza ngayo izinto. Lokhu kuseyisiqalo nje,” usho kanje lo mqeqeshi ovale isikhala sikamakademoba uCarlo Ancelotti.
Ngesizini edlule yomibili imidlalo yeligi phakathi kwala maqembu yaphela ebambene ngo 1-1.
Imidlalo yeLa Liga kule mpelasonto
Namuhla: 2pm - Getafe vs Levante; 4.15pm - Atlético Madrid vs Real Madrid; 6.30pm - Mallorca vs Alavés; 9pm Villarreal vs Athletic Club.
Kusasa: 2pm - Rayo Vallecano vs Sevilla; 4.15pm - Elche vs Celta Vigo; 6.30pm Barcelona vs Real Sociedad; 9pm - Real Betis vs Osasuna.