Idili lemidlalo yeCarling Knockout eKZN

BAZOBHEMA bakholwe abathandi bebhola baKwaZulu-Natal njengoba izobe ithe cithi saka imidlalo yeCarling Knockout kulesi sifundazwe ngempelasonto ezayo.

Lo mqhudelwano ozobe udlalwa okwesithathu selokhu uthole abaxhasi abasha wethulwe ngokusemthethweni phakathi nesonto, kwaqhathwa namaqembu azogadulisana kwiLast 16.

Izolo iPremier Soccer League ibe isiqinisekisa imidlalo izinsuku, izikhathi zemidlalo, nezinkundla okuzodlalelwa kuzona.

IDurban City FC izovula inkundla ngokutholana phezulu nePolokwane City eChatsworth Stadium ngo-7 ebusuku.

Leli qembu belingekho esigabeni esiphezulu ngesikhathi iCarling Knockout idlalwa okokuqala ngesizini ka-2023/24, nangesizini edlule.

Lisavule kahle kweyeligi, nokuzonika abalandeli balo ithemba lokudlulela emzuliswaneni olandelayo kulo mqhudelwano womkhumulajezi.

ILamontville Golden Arrows izobhekana neSekhukhune United eKing Zwelithini Stadium ngoMgqibelo ngo-6 ntambama. 

Mibili imidlalo ezodlalelwa eKZN ngeSonto njengoba iRichards Bay FC, esifinyelele kowandulela owamanqamu kabili kulo mqhudelwano, izogadulisana neChippa United eMhlathuze Sports Stadium ngo-3 ntambama.

AmaZulu azobe esebhekana nompetha, iMagesi FC, eMoses Mabhida Stadium ngo-6 ntambama. 

Usuthu neMagesi basanda kubhekana koweligi ngo-Agasti 30 owaphela zibambene ngo 1-1, nokuyinto umdlali wasesiswini waMaZulu, uBongani Zungu, athi yenza bawubheke ngabomvu lo mdlalo womkhumulajezi.

“Sijabule ngendlela amaqembu aqhathwe ngayo. Sisanda kudlala neMagesi, ngakho-ke siyazi ukuthi kunzima kangakanani ukubhekana nayo. Okuhle wukuthi sinerekhodi elihle uma sibhekene nabo,” kusho uZungu.

Ngesizini edlule sibanqobe kabili kweyeligi owakamuva sawudlala ngokulingana. Siwubheke ngabomvu umdlalo, ikakhulukazi njengoba sizobe sidlalela ekhaya,” kuphetha yena.

Uhlu oluphelele lwemidlalo yeCarling Knockout

Okthoba 3 - Durban City v Polokwane City (7pm, Chatsworth Stadium).

Okthoba 4 - Orlando Pirates v Siwelele FC (3pm, Orlando Stadium), Orbit College FC v TS 

Galaxy FC ( 3pm, Olympia Park), Lamontville Golden Arrows (6pm, King Zwelithini Stadium), Mamelodi Sundowns v Marumo Gallants (Lucas Moripe Stadium).

Okthoba 5 - Stellenbosch FC v Kaizer Chiefs (3pm, DHL Stadium), Richards Bay FC v Chippa United (3pm, Umhlathuze Stadium), AmaZulu FC v Magesi FC (6pm, Moses Mabhida Stadium).