IChiefs izongena kwenye impi ingaphelele koweCaf
Umdlali weKaizer Chiefs uGaston Sirino
Image: Itumeleng English Independent Newspapers
IKAIZER Chiefs ibhekene nesivivinyo esinzima njengoba izobhekana neKabuscorp yase-Angola emlenzeni wesibili womdlalo wokuhlungela iCAF Confederation Cup eFNB Stadium ngo-3 ntambama.
Amakhosi azongena kulo mdlalo elandela ngemuva kulandela ukunqotshwa ngo 1-0 emlenzeni wokuqala obuseLuanda, e-Angola, ngoMgqibelo odlule.
Igoli lokubika kulowo mdlalo libekwe enethini ngekhanda nguJulio maphakathi nesiwombe sesibili.
Leli qembu lidinga ukukhuphula izinga namuhla ntambama ukuze lidlulele emzuliswaneni wesibili wokuhlungela isigaba samaqoqo seConfederation Cup.
IChiefs iyiqale kahle isizini kwiBetway Premiership kodwa izinga layo lehlile muva nje.
Lezi zinkunzi zaseSoweto zehlulekile ukunqoba emidlalweni yazo emithathu yakamuva emiqhudelwaneni ehlukene.
Ziqale zaqunjwa phansi yiSekhukhune United ngo 3-1 kwalandela iKabuscorp, zaphinde zabambana ngo 1-1 neMarumo Gallants kowakamuva weligi yasekhaya.
Ngaphandle kwenkundla kunesinye isiphithiphithi kwazise akucaci ukuthi kuqhubekani ngekusasa lomqeqeshi uNasreddine Nabi.
Emidlalweni emibili edlule izintambo beziphethwe amaphini omqeqeshi, uCedric Kaze noKhalil Ben Youssef. Iqembu likhiphe isitatimende ngesonto eledlule liqinisekisa ukuthi uNabi akekho eqenjini njengoba izingxoxo ngekusasa lakhe zisaqhubeka.
Yize kunalezi zinselelo, uKaze ukholelwa ekutheni abadlali bayabuqonda ubumqoka bomdlalo wanamuhla.
"Wonke amaqembu ayadlula ezikhathini ezinje. Sisebholeni elikhokhelwayo. Silapha ukuzosebenzela iKaizer Chiefs futhi siyakwazi okuphambi kwethu," kusho uKaze.
"Izinto ezenzekile manje zisemva kwethu. Sibheke umdlalo olandelayo ngezinhliziyo zethu zonke, ngemiqondo yethu yonke futhi sizimisele ukwenza abalandeli baziqhenye, siqhube umlando weqembu.”
IChiefs idinga ukushaya okungenani amagoli amabili ukuze igweme ukuwashiswa ijezi nokukhahlelwa kwamaphenathi. Kufanele ivale kahle nasemuva ukuze iKabuscorp ingalitholi igoli lasekuhambeni elingenza umthwalo ube nzima kakhulu.
“Sixoxile nabadlali, bayazi ukuthi lo mdlalo ubaluleke kangakanani kubona, kuwo wonke umuntu oyingxenye yeqembu nasemlandweni walo. Bayazi ukuthi ukuze sidlulele emzuliswaneni olandelayo kumele sishaye amagoli, singavumeli izitha zishaye igoli,” kusho uKaze.
“Ngeke singene enkundleni nomqondo wokuthi singcono kunaleli qembu ngoba ngeke kusisebenzele lokho. Ngisho ungazibona ungcono kunezitha kodwa zingakwazi ukukulimaza ngephutha elilodwa njengoba sibonile emlenzeni wokuqala.
“Azingalitholi igoli nge-freekick noma ikhona. Yingakho sidinga ukuzimisela nokuzethemba. Abalandeli bethu nabo bazoklama indima enkulu.”
Uma iChiefs idlula kulo mzuliswano izobhekana neDjabal FC yaseComoros noma i-AS Simba yaseDemocratic Republic of Congo emzuliswaneni olandelayo.