Amajita nenselelo yokuthuthukisa irekhodi kweyoMhlaba
IQEMBU lesizwe lika-Under-20 ngesikhathi libhiyozela ukunqoba i-Afcon ngoMeyi.
Image: FACEBOOK
LINETHEMBA lokuthilizowubhala kabusha umlando eNdebeni yoMhlaba iqembu lakuleli lika-Under-20 labesilisa oyiphini lomqeqeshi uKarabo Mogodi.
Lo mqhudelwano obanjelwe eChille uzoqala namuhla ebusuku kodwa iqembu lakuleli lizoqala eyamaqoqo ngoMsombuluko.
Kuzobe kungokwesihlanu Amajita edlala kulo mqhudelwano njengoba ayeyingxenye yawo ngo-1997, 2009, 2017 nango-2019.
Nokho, awakaze adlulele esigabeni somkhumulajezi phambilini. Asanqobe umdlalo owodwa kwengu-12 aseyidlalile eNdebeni yoMhlaba, nokwenzeka ngo-2009 ngesikhathi eguqisa iHonduras ngo 2-0 ngamagoli kaSibusiso Khumalo beno-Andile Jali.
Iqembu lakuleli liseqoqweni elingelula njengoba liqhathwe neFrance, United States neNew Caledonia kuGroup E.
Lizovula neFrance ngoMsombuluko ngo-10 ebusuku e-Estadio El Teniente, edolobheni iRancagua.
IFrance ifinyelele kowamanqamu emqhudelwaneni wase-Europe wokuhlungela leNdebe yoMhlaba ngoJulayi nyakenye, yanqotshwa yiSpain ngo 2-0.
Amajita azongena kulo mqhudelwano ezethemba njengoba engompetha besifunda iCosafa kanye nezwekazi i-Afrika.
Leli qembu elicijwa nguRaymond Mdaka libe ngompetha base-Afrika ngesikhathi liguqisa iMorocco ngo 1-0 kowamanqamu we-Africa Cup of Nations ngoMeyi nonyaka.
“Likhulu isasasa eqenjini ngoba laba badlali bayaqala ukudlala kuleli zinga. Baqale ngokunqoba isicoco seCosafa, baya kwi-Afcon, kodwa iNdebe yomhlaba isezingeni eliphezulu kakhulu," kusho uMogodi.
"Kusobala ukuthi wonke amaqembu ayingxenye yalo mqhudelwano ayingozi ngoba adlule ekuvivinyweni okuningi ukuze afike lapha. Ngicabanga ukuthi abadlali balungile ngokomqondo, okusho ukuthi bazokwazi ukunamathela ezinhlelweni zethu, benze konke okusemandleni abo enkundleni.”
Amajita azodlala umdlalo wesibili wamaqoqo neNew Caledonia ngoLwesihlanu, bese egadulisana ne-United States ngeSonto.
INew Caledonia ingene kulo mqhudelwano ngokuqeda endaweni yesibili emqhudelwaneni wokuhlunga we-Oceania Football Confederation (OFC), i-United States yalala isibili kweyokuhlunga yeCONCACAF.