OwePirates nethuba lokwenza izinguquko koweCaf
UNKOSINATHI Sibisi, Makhehleni Makhaula noKabelo Dlamini ngabanye babadlali umqeqeshi we-Orlando Pirates, u-Abdeslam Ouaddou, angase abanike ithuba emdlalweni wakusasa neLioli FC.
Image: FACEBOOK
UMDLALO womlenze wesibili womzuliswano wokuqala wokuhlungela isigaba samaqoqo seCaf Champions League i-Orlando Pirates ezowudlala neLioli FC, uzonika umqeqeshi we-Orlando Pirates, u-Abdeslam Ouaddou, ithuba lokuphumuza ezinye zezethenjwa zakhe.
EZimnyama zizobhekana okwesibili naleli qembu elingompetha baseLesotho, e-Orlando Stadium kusasa ngo-3 ntambama.
Zizongena kulo mdlalo zihamba phambili ngo 3-0 wamagoli amabili kaTshegofatso Mabasa nelilodwa lika-Oswin Appollis eziwashaye emlenzeni wokuqala obuseToyota Stadium, eBloemfontein, ngoMgqibelo odlule.
Kubadlali bePirates asebedlale imizuzu eminingi emiqhudelwaneni ehlukene kule sizini kubalwa unozinti uSipho Chaine, izitobha uMbekezeli Mbokazi, Lebone Seema noDeon Hotto, nabasesiswini uSihle Nduli, Relebohile Mofokeng, Oswin Appollis nabanye.
Kubadlali abebevele bekhona ngesizini edlule u-Ouaddou angakhetha kubona kukhona unozinti uMelusi Buthelezi, abasemuva uNkosinathi Sibisi noBandile Shandu. Kwabasesiswini nguKabelo Dlamini, Selaelo Rasebotsa nabanye.
Bakhona nabasayiniswe ngaphambi kokuqala kwesizini asebeke bawathola amathuba emidlalweni yokuvula isizini kodwa asebelizwa ngendaba ijezi kulezi zinsuku njengoSinoxolo Kwayiba, Abdoulaye Mariko, Yanela Mbuthuma, Nkosikhona Ndaba nabanye.
Ukwenza izinguquko kuzobe kungasho ukuthi u-Ouaddou uyibukela phansi iLioli kodwa kuzobe kuhambisana nezinhlelo zakhe nethimba lakhe labaqeqeshi asekhulume ngazo kaningana zokunakekela abadlali.
Ukufaka abanye abadlali abangajwayele ukudlala kungaletha umfutho omusha ongaholelala ekutheni ezakhe ziphinde zishaye amanye amagoli azokwenza zingene kalula emzuliswaneni ozayo.
Umqeqeshi weLioli, uBongani Maseko, uwaxwayisile amaBhakabhaka ngokuthi umdlalo awukapheli yize ehamba phambili ngamagoli amathathu futhi ezovunwa wukudlalela ekhaya kulo mlenze wesibili.
“Singemuva ngamagoli amathathu kodwa kufana nokuthi kusadlalwe isiwombe sokuqala, kusazodlalwa esesibili. Sizohlaziya sibheke okufanele sikulungise ngaphambi kwalo mldlalo wesibili. Sisazoqhubeka nokulwa ngoba umdlalo awukapheli. Kusanemizuzu engu-90 ezodlalwa,” usho kanje lo mqeqeshi odabuka eNingizimu Afrika.
Iqembu elizodlula phakathi kwePirates neLioli lizobhekana nelizonqoba phakathi kweSaint Eloi Lupopo yaseDemocratic Republic of Congo ne-El Merrikh yaseSudan emzuliswaneni olandelayo.
La maqembu azobhekana okokuqala kusasa ntambama bese edlala umlenze wesibili ngo-Okthoba 4.