LIGQABUKILE igoda phakathi kweKaizer Chiefs nomqeqeshi, uNasreddine Nabi, obenuka iqaqa kubalandeli bayo.
Ngokwemibiko elishone elayizolo isisabalele, uNabi uhlukane naMakhosi ngenxa yokuthi akanawo amaphepha afanele amgunyaza ukuthi ahlale ebhentshini emidlalweni yeCaf. IChiefs izobhekana neKabuscorp S.C.P yase-Angola emdlalweni womlenze wokuqala wokuhlungela isigaba samaqoqo seCaf Confederation Cup ngoMgqibelo ngo-5 ntambama ekuhambeni. Owomlenze wesibili uzoba seFNB Stadium, eNasrec, ngoSepthemba 27,
UNabi oqede isomiso sezindebe seminyaka kwiChiefs eyiwinisa iNedbank Cup ngesizini edlule, ubengekho emidlalweni yokuqala yesizini yaMakhosi aqoqe kuyona amaphuzu agcwele. Kuthiwa utheleke eNaturena izolo, watshelwa ukuthi useyamiswa emsebenzini ngenxa yamaphepha akhe okuqeqesha emidlalweni yeCaf angaqondile. Lo mqeqeshi waseTunisia unelayisensi yokuqeqesha yase-Europe, i-UEFA Pro License, ephelelwa yisikhathi ngo-2026, okuzodingeka ayivuselele. Ngokwezinga, le layisensi iyalingana neyokuqeqesha yase-Afrika, iCaf Pro License efunekayo emidlalweni yeCaf. Ngokwemibiko esabalele, amaphepha ahambisana nelayisensi yakhe amgunyaza ukuthi aqeqeshe kwiCaf, asedlulelwe yisikhathi.
Ngokubika kwe-SABC, amaphepha aqondile kaNabi agcine efikile kodwa kube nhlanga zimuka nomoya, izinhlangothi zombili zavumelana ngokuthi zihlukane izindlela. Ngaphezu kwendaba yamaphepha, kuthiwa abaphathi beChiefs bacikwe yindlela iqembu elihlulwe ngayo yiSekhukhune United emdlalweni weBetway Premiership ngoLwesibili. Amakhosi akhale ngaphansi ngo 3-1 obekungokokuqala ehlulwa kule sizini futhi abeqala ukulanda ibhola enethini. .
UNabi uhlukana neChiefs nje, emasontweni adlule uphoqeleke ukubuyela ekhaya eTunisia kulandela ukulimala komkakhe. Umkhumbi waMakhosi uwushiye ezandleni zamaphini akhe uKhalil Ben Youssef noCedric Kaze. Ngaphansi kwawo, iChiefs iwine imidlalo emithathu ilandelana ixebula iStellenbosch ngo 2-0, Polokwane City ngo 1-0 neBay United ngo 1-0. Ekubuyeni kukaNabi, iChiefs ibanjwe yiMamelodi Sundowns ngo 0-0, yahlula iLamontville Golden Arrows ngaphambi kokwehlulwa yiSekhukhune United ngoLwesibili ebusuku.
IDiski Times iveze ukuthi isizathu zokuhlukana kwakhe neChiefs wukuthi udinga ukuyobhekana nezimo zangaphandle kwenkundla okubalwa kuzona impilo yomkakhe.
IChiefs ayiphawulanga ngezindaba zokuhlukana kwayo noNabi.
Related Topics: