ISundowns ilahle ithuba lokuqhwakela kwiBetway Premiership
UMQEQESHI weMamelodi Sundowns, uMiguel Cardoso.
Image: Itumemeleng English Independent Media
IMAMELODI Sundowns ilahle amaphuzu okwesithathu kule sizini, yayeka ithuba lokubuyela esicongweni kwiBetway Premiership ibambana ngo 1-1 neMarumo Gallants eDr Molemela Stadium, eBloemfontein, izolo ebusuku.
AmaSandawana angene kulo mdlalo elandela ngemuva kwiSekhukhune United, eqhwakele kulandela ukucosha amaphuzu amathathu kwiKaizer Chiefs eyihlule ngo 3-1 eFNB Stadium ngoLwesibili.
AmaBrazilian ahambe phambili ngegoli elibekwe enethini ngu-Iqraam Rayners ngekhanda engamakiwe ebhokisini ngomzuzu ka-28, ehlangana nebhola ebeligotshwe nguMarcelo Allende engakwesokudla.
Kodwa injabulo yawo isheshe yaphela ngesikhathi iGallants ithola elokulinganisa ngomzuzu ka-35. Ibhola ebelikhahlelwe nguNdabayithethwa Ndlondlo livinjwe nguRonwen Williams, lashayisa esitobheni uKeanu Cupido, layongena enethini.
Nakuba uMiguel Cardoso enze izinguquko ezonhlanu esiwombeni sesibili, efaka u-Aubrey Modiba, Khuliso Mudau, Kutlwano Letlhaku, Tashreeq Morris noLebo Mothiba, ihlulekile ukugqobhoza udonga lweGallants ebimaka kahle emuva iphinde izame ukuhlasela ngokuzuma.
Lo mphumela ushiye leli qembu laseMamelodi endaweni yesibili kwi-log ngamaphuzu angu-15 emidlalweni eyisikhombisa.
Lisele ngephuzu kwiSekhukhune esahamba phambili, kanti lingaphambili ngamabili kwiChiefs esendaweni yesithathu. Womabili la maqembu asadlale imidlalo eyisithupha.
Nangesizini edlule amaSandawana ayenamaphuzu angu-15 ngemuva kwemidlalo eyisikhombisa, kodwa ehlezi esicongweni.
Noma kunjalo, lo mphumela uphinde wakhombisa ukuthi kusazoba nzima ukuqagela imiphumela yemidlalo kule sizini, ikakhulukazi eyeSundowns ejwayele ukushosholoza kwiligi kodwa esidlale ngokulingana kathathu kule midlalo eyisikhombisa.
Umdlalo olandelayo weBetway Premiership, iSundowns izowudlala nelinye lamaqembu ayiqale kahle isizini, iDurban City, eLucas Moripe Stadium, e-Atteridgeville, ngoMgqibelo ngo-8 ebusuku.
IGallants isendaweni yesishiyagalolunye ngamaphuzu ayisishiyagalombili emidlalweni eyisithupha. Izobhekana ne-Orbit College FC e-Olympia Park, eRustenburg, ngo-8 ebusuku.