UDe Kock ujabulela ukuthathwa kancane kweDurban City
UMDLALI wasemuva, uLiam De Kock, uyabuqonda ubungozi beSiwelele FC abazobhekana nayo emdlalweni weBetway Premiership eChatsworth Stadum namuhla ebusuku
Image: Isithombe:FACEBOOK/DURBAN CITY
ISITOBHA seDurban City, uLiam De Kock, siyachazeka ngokubukelwa phansi kwabo kwiligi yeBetway Premiership.
ICity engomakoti kwiPremiership, imangaze abaningi iqala isizini ngegiya eliphezulu kule ligi ethathwa njengenye yanzima ebholeni lase-Afrika. Emidlalweni eyisihlanu, iwine emibili, yadlala ngokulingana kwemibili, yahlulwa kowodwa. Leli qembu eliphekwa ngumqeqeshi, uGavin Hunt, lithola le miphumela nje, lisathungatha abadlali elizoqinisa ngabo njengoba lilwela ukungabuyeli kwiMotsepe Foundation Championship. Nokho selivele linaso isisekelo esiqinile kwazise lishaya ngabadlali abanamava okubalwa kubona unozinti uDarren Keet noThabo Nodada abagawulwe yizembe neCape Town City ekupheleni kwesizini edlule.
UDe Kock, owayedlalela iStellenbosch FC kwiDStv Diski Challenge, ubona ukuthathwa kancane kwabo kubasebenzela.
"Kusuka emdlalweni odlule (abahlulwe kuwona yiSekhukhune United ngo 2-0) besisebenza kanzima, sizama ukulungisa amaphutha esiwenzile. Okungijabulisa kakhulu wukuthi abantu basithatha kancane, abalazi izinga eliphezulu kubadlali esinabo. Iyangithokozisa futhi nendlela esizwana ngayo singabadlali. Ngakho enkundleni kukhulu esizokwenza,"kusho uDe Kock.
iCity izokwamukela iSiwelele FC emdlalweni wePremiership eChatsworth Stadium namuhla ngo-7.30 ebusuku. Kuleli qembu, uHunt uzobhekana nabadlali abaziyo kwazise ubebaqeqesha besabizwa ngeSuperSport United ngaphambi kokuxoshwa ngesizini edlule. Akubuzwa ukuthi lolu lwazi uzolusebenzisa ukubahlelela ukuze kujabule abaqashi bakhe abasha abamcoshe ejika nelanga ngaphambi kokuqala kwesizini ka-2025/2026.
"ISiwelele inakho ukuba nzima njengeqembu ngosuku lwayo futhi ingenza ezibukwayo. Kodwa ngiyakholelwa kubafana ukuthi bazokwazi ukwenza okulindelekile. Ngicela abalandeli beDurban City baphume ngobuningi ukuzoseseka kulo mdlalo," kusho uDe Kock.