Ochithwe yiPirates usebeke ithemba kwiDurban City

UMDLALI ochithwe yi-Orlando Pirates, uKatlego Otladisa, uselinde abaphathi beDurban City ukuthi banqume ngekusasa lakhe njengoba ezama inhlanhla kuleli qembu.

U-Otladisa ukhonjwe indlela yiPirates emasontweni adlule, emuva kwamasonto ambalwa ebuye ekubolekisweni kwiSekhukhune United. Leli qembu limphindisele kweZimnyama kungasekuhle kulandela ukuxabana kwakhe nozakwabo, uKeletso Makgalwa. Kuphele isizini edlule u-Otladisa eselizwa ngendaba ijezi kwiSekhukhune. Ngesonto eledlule, kuvele ukuthi lo mdlali odle ngejubane nomjiko uziqeqesha neCity ngaphansi kweso elibukhali lomqeqeshi, uGavin Hunt.

Imenenja ka-Otladisa, uNimrod Mbhalati, ithe sebelinde isinqumo sabaphathi beCity ngekusasa lalo mdlali.

"U-Otladisa useqede isonto lonke kwiDurban City. Ngafonelwa ngusihlalo (Farook Kadodia) wacela ukuthi bezombukela eduzane, bamhlelela konke. Uqale ukuziqeqesha ngoMgqibelo odlule. Akhona namanye amaqembu amfunayo kodwa sinqume ukunika ithuba iDurban City, sibone ukuthi kuphelelaphi,'' kusho uMbhalati.

"Sisalindile ukuzwa ukuthi kuzophetha kanjani kodwa sinethemba. Ukuziqeqesha kwakhe neqembu isikhathi eside kanje kuyizinkomba zokuthi izinto zizolunga. Naye umfana unethemba lokuthi uzolithola ikhaya elisha kwiCity."

U-Otladisa owakhulela kwiPlatinum Stars ayevutha kuyona, usebuya nakwiMamelodi Sundowns aphume kuyona eminyakeni edlule, emuva kokuhlala isikhathi eside engadlali ehlushwa wukulimala. Wabuyela ezingeni lakhe ngesizini ka-2022/2023 esedlalela iMarumo Gallants. Yilapho iPirates eyanquma ukumsayinisa khona.

"Uphatheke kabi ngesikhathi ehlukana nePirates kodwa kufanele aqhubekele phambili. Kufanele impilo iqhubeke. Akukhona okokuqala ehlukana neqembu elikhulu.