Lizofika lingakafudumali elaseLesotho elizobhekana nePirates
UMDLALI wasesiswini weqembu laseLesotho iLioli FC , uSihle Maso, okubhekwe ukuthi abe wuhlupho kwi-Orlando Pirates.
Image: FACEBOOK
IQEMBU laseLesotho, iLioli FC, lizofika lingakangeni kahle egiyeni njengoba lizodudulana ne-Orlando Pirates emzuliswaneni wokuqala wemidlalo yokuhlungela isigaba samaqoqo seCaf Champions League.
Nakuba umlenze wokuqala kuzobe kuwumdlalo wasekhaya weLioli kodwa uzodlalelwa eToyota Stadium, eBloemfontein, ngoMgqibelo ngo-3 ntambama, ngenxa yokungabibikho kwezinkundla ezifanele imidlalo yaleli zinga eLesotho.
Leli qembu alikalitholi ithuba lokudlala imidlalo eminingi esemthethweni kwazise iligi yaseLesotho, iVodacom Premier League, iqale ngempelasonto edlule.
ILioli, esibe ngompetha baseLesotho amasizini amabili elandelana, ivule isizini ngegiya eliphezulu, iqumba phansi iMembers FC ngoMgqibelo.
Ngalo lolo suku, iPirates ibidlala umdlalo wayo wesishiyagalolunye kule sizini, iguqisa iStellenbosch FC ngo 3-0 kowamanqamu weMTN8.
EzikaMagebhula sezidlale imidlalo emine kwiMTN8, nemihlanu kwiBetway Premiership.
Ngenyanga edlule, iLioli idlale imiqhudelwano emithathu yokulungiselela isizini. Ibe ngompetha be-Alliance Challenge Cup, yaphinde yadlala kwi-4Nations Tournament neRamela Football Spectacular, lapho inqotshwe khona emidlalweni yamanqamu.
Leli qembu lasungulwa ngo-1932, kanti lingelinye lahamba phambili eLesotho njengoba selibe ngompetha bakhona amahlandla ayisikhombisa.
ILioli, ephinde iteketiswe ngokuthi iTse Nala, iphekwa ngumqeqeshi wakuleli, uBongani Maseko, obecija iMahika Champions kwi-ABC Motsepe League, eNorth West, ngesizini edlule.
Lo mqeqeshi uphoselwe izintambo ngoJuni, ngemuva kokuthi lihlukene nomqeqeshi olinqobise iligi kabili kulandelana, uMotheo Mohapi, osejoyine enye yezimbangi zalo ezinkulu iBantu FC.
Umdlali okulindeleke ukuthi abe yiphela endlebeni kweZimnmyama ngowasesiswini, uSihle Maso, owake wagijima eqenjini elidlala kwi-ABC Motsepe League e-Eastern Cape, Amavarara FC.
Lo mdlali (30) uthole indondo yePlayer of the Season neyePlayers’ Player of the Season ngesikhathi kuklonyeliswa abadlali abavelele ngesizini edlule kwiVodacom Premier League Awards ngoJuni. Uphinde wahlabana ngezindondo ezine ngesikhathi iLioli yenza owayo umcimbi wokuklomelisa abadlali ngoJulayi.
Amaqembu aseLesotho asebhekane nawaseNingizimu Afrika amahlandla ayisishiyagalombili emidlalweni yeCaf Champions League kusukela ngo-1994, kanti awakaze anqobe nakanye.