Lisazakhela igama elizobhekana neChiefs koweCaf
ABADLALI beqembu elizobhekana neKaizer Chiefs koweCaf Confederation Cup, iKabuscorp, bezilolonga e-Angola.
Image: FACEBOOK
KUZOHLANGANA amaqembu abheke ukukhuphula izinga kule sizini ka-2025/26 uma iKaizer Chiefs isibhekene neqembu lase-Angola, iKabuscorp Sport Clube do Palanca, emzuliswaneni wokuqala weCaf Confederation Cup.
Lo mdlalo ozoqala ngo-5 ntambama ngoMgqibelo, e-Estádio 11 de Novembro, uzobe uphakathi kwamaqembu abe nemiphumela ethi ayifane emiqhudelwaneni ehlukene ngesizini edlule.
Womabili aqede endaweni efanayo kumaligi asekhaya kodwa akwazi ukwehlisa ingcindezi ngokunqoba indebe emqhudelwaneni womkhumulajezi.
Ngesizini edlule, iChiefs ilale endaweni yesishiyagalolunye kwi-log yeBetway Premiership ngamaphuzu angu-32 emidlalweni engu-28 ngenxa yokuhluleka ukubamba umgqigqo.
Kodwa ibajabulisile abalandeli iqeda isomiso sezindebe seminyaka ngokudla isicoco seNedbank Cup.
IKabuscorp nayo iqede endaweni yesishiyagalolunye kwiligi yase-Angola, iGirabola, ngesizini edlule, kodwa yaba ngompetha bomqhudelwano womkhumulajezi, iTaça de Angola.
Amakhosi ayiqale kahle isizini kwiBetway Premiership lapho esedlale khona imidlalo eyisithupha kwiBetway Premiership.
IKabuscorp ayikadlali midlalo yeligi kule sizini njengoba eyase-Angola izovula kuyona le mpelasonto, yize isidlale owodwa we-Angolan Super Cup.
Kulo mdlalo odlalwa ngompetha beligi nabomqhudelwano womkhumulajezi, ibhekane nompetha beGirabola bangesizini edlule, iPetro de Luanda, yanqotshwa ngo 2-0.
Leli qembu lase-Angola lasungulwa ngo-1994 kodwa selike laba ngompetha beligi ngo-2013, lanqoba isicoco seSuper Cup ngo-2014.
Laba sematheni ngo-2012, ngesikhathi lisayinisa owake waba yisilomo seBrazil namaqembu afana neBarcelona ne-AC Milan, uRivaldo, owadlala isizini eyodwa kulona.
Umlenze wesibili phakathi kweChiefs neKabuscorp uzodlalelwa eGoli, ngoSepthemba 27.
Iqembu elizonqoba uma sekuhlanganiswe imilenze yomibili lizobhekana nelizodlula phakathi kwe-AS Simba yaseDemocratic Republic of Congo neDjabal FC yaseComoros emzuliswaneni wesibili.