Kuhlukene imiboko ngokuya kwiNdebe yoMhlaba kwe-TLB

IHLUKENE imibono ngodaba lokuyodlala emqhudelwaneni weNdebe yoMhlaba yabaneminyaka engaphansi kuka-20 kukaMbekezeli Mbokazi osephenduke ithemba le-Orlando Pirates neBafana Bafana.

Iqembu laseMzansi lika-Under 20, Amajita, lizodlala kwiNdebe yoMhlaba ezoba seChile kusukela ngoSepthemba 27 kuya ku-Okthoba 19. Umqeqeshi walo, uRaymond Mdaka omfunayo uMbokazi (19), uzosimemezela namuhla isikwati sabadlali abangu-23 esizomela iNingizimu Afrika kulo mqhudelwano odonsa amaqembu amakhulu emhlabeni ahlale ethungatha abadlali abanekhono. Ngenxa yokuthi lo mqhudelwano awukho ngaphansi kwekhalenda leFifa, amaqembu awaphoqelekile ukudedela abadlali. Yilokho ke okwenza imibono ihlukane ngoMbokazi abaningi ababona edingeka kwiBafana ezodlala imidlalo yokuhlungela iNdebe yoMhlaba ngenyanga ezayo. Kanjalo nakwiPirates uyadingeka kwazise izitobha zayo zibuya ekulimaleni.

UBheki Mdletshe, owayeqeqesha uMbokazi kusukela esemncane eHluhluwe, KwaNibela, uthe ngokwakhe ufisa lo mdlali agxile kwiBafana.

"Ngokwethu sibheke ukuthi adlalele iBafana ukuze kuzonyuka isibalo semidlalo eqenjini lesizwe okuyinto ezosisiza njengoba kukhona amaqembu aphesheya kwezilwandle amfunayo. Imidlalo yeqembu lika-Under 20 ayisisizi ngalutho kulokho. Ngikhulumile naye ngendaba yokudlalela iqembu lika-Under 20, washo ukuthi akufuna kakhulu wukudlalela iBafana," kusho uMdletshe.

UMbokazi ugcine ukudlalela Amajita ewina umqhudelwaneni iCosafa Cup eMozambique, nyakenye. Kulo mqhudelwano ubedlala ngokuzwana maphakathi emuva noTylon Smith osedlalela iQueens Park Rangers yase-England. Ubengekho ngesikhathi Amajita ewina i-Africa Cup of Nations (Afcon) e-Egypt ngoMeyi.

Umqeqeshi we-Pirates, u-Abdeslam Ouaddou, ukubeke eqenjini okuzokwenzeka ngoMbokazi.

"Mayelana nokaputeni wethu (Mbokazi), ngeke ngimvimbe futhi iqembu alimvimbi umdlali ekuyeni eqenjini lesizwe. Kubalulekile ukumela izwe nokuba yingxenye yabadlali abahamba phambili ezweni. Sizokhuluma nabaphathi mayelana nalokho (ukuthi uMbokazi uzoya yini kwiNdebe yoMhlaba ka-Under 20) kodwa ngeke simvimbe umuntu ekudlaleleni iqembu lesizwe,"kusho u-Ouaddou. 

Umengameli weSouth African Football Association (Safa), uDanny Jordaan, ucashunwe yiSABC ethi unethemba kokuthi iPirates izomdedela uMbokazi.

"Asikazi sibe nomdlali wasemuva oseqophelweni eliphezulu kule minyaka (engaphansi kuka-20). Ithuba lokudlala kwiNdebe yoMhlaba ka-Under 20 likhulu ngoba umhlaba wonke uyayibuka. Ngithemba ukuthi sizobona ngaso linye nePirates,"usho kanje.

"Sineqembu eliqinile futhi ngiyathemba ukuthi uMbokazi uzohamba nalo ngoba uma ekhona udonga lwethu lwasemuva luzoqina kakhulu."

Abanye abadlali okulindeleke ukuthi bathole indawo esikwatini sikaMdaka nguSmith, Siyabonga Mabena weMamelodi Sundowns noNaledi Hlongwane weKaizer Chiefs.