Ithuba leDowns lokuzibeka esicongweni seBetway
UMGADLI weMamelodi Sundowns uLebo Mothiba uthi konke kumi ngomumo ngaphambi komdlalo weBetway Premiership neMagesi FC.
Image: BACKPAGEPIX
IMamelodi Sundowns ingase igxume iyohlala esicongweni kwiBetway Premiership njengoba izobhekana neMagesi FC eLucas Moripe Stadium ngeSonto ngo-3 ntambama.
AmaSandawana, asendaweni yesithathu kwi-log ngamaphuzu angu-11 emidlalweni emihlanu, asele ngamaphuzu amabili emaqenjini ahamba phambili, iSekhukhune United neKaizer Chiefs.
Njengoba wona ezoze abuyele enkundleni uma eseyohlangana emdlalweni obhekwe ngabomvu ngoLwesibili ebusuku, kungenzeka atholane phezulu eselilandela ngemuva leli qembu lasePitoli.
AmaBrazilian awakanqotshwa kwiligi kule sizini njengoba esenqobe imidlalo emithathu, adlala ngokulingana kabili.
Lo mdlalo wawo neMagesi ufika nje basanda kubhekana komunye weligi owawuseSeshego Stadium, eLimpopo, ngo-Agasti 20.
Ngalelo langa iDikwena Tsa Meetse yayimisa kabi iSundowns kodwa yagcina igobe uphondo inqotshwa amagoli avalelwa enethini nguJayden Adams noPeter Shalulile esiwombeni sesibili.
Umgadli wamaBrazilian, uLebo Mothiba, uthi basebenzise isikhathi sekhefu leFifa ukulungiselela lo mdlalo futhi akubakhathazi ukubhekana neqembu abasanda kudlala nalo.
“Sisebenze kanzima kuleli khefu. Sihlangane kahle nabaqeqeshi siziqeqesha nabadlali abebekhona. Njengoba sibheke umdlalo ngeSonto neMagesi," kusho uMothiba.
"Akusididisi emiqondweni ukuthi sizodlala neqembu esisanda kubhekana nalo. Sonke sidlala ezingeni elikhokhelayo futhi sinamava. Sikuthatha njengento enhle ukuthi sizophinde sibhekane nabo ngoba sesiyayazi indlela abadlala ngayo.
“Bathanda ukuhlasela ngqo ngamabhola amade ngoba banabagadli abade futhi abanamandla. Siyilungele noma yini abazofika nayo ngeSonto.”
Ngesizini edlule iMagesi yanqoba iSundowns ngo 2-1 kowamanqamu weCarling Knockout Cup, kodwa ayilibonanga elidlalayo kwemibili yeligi, iguqiswa ngo 2-1 ekhaya nango 2-0 ekuhambeni.
Lo mdlalo yiwona wodwa oweBetway Premiership ozodlalwa kule mpelasonto njengoba ngoMgqibelo bekunowamanqamu weMTN8.