OweNigeria uthembisa ukulihlanganisa iqembu

USAZOQHUBEKA nokubheka izixazululo ukuze iqembu lidlale ngendlela afisa ngayo umqeqeshi weNigeria, u-Eric Chelle.

Lo mqeqeshi odabuka e-Ivory Coast, uthathe izintambo kwiSuper Eagles ngoJanuwari, nonyaka, evala isikhala sika-Augustine Eguavoen.

Leli qembu selidlale imidlalo emine yokuhlungela iNdebe yoMhlaba yangonyaka ozayo ngaphansi kwesandla sakhe.

KweyangoMashi, linqobe iRwanda ngo 2-0 labambana ngo 1-1 neZimbabwe. Kweyakamuva linqobe iRwanda ngo 1-0 ladlala ngokulingana ngo 1-1 neBafana Bafana.

Le miphumela ilishiye endaweni yesithathu kuGroup C ngamaphuzu angu-11. Lisele ngayisithupha kwiBafana eqhwakele, nangamathathu kwiBenin esendaweni yesibili.

Lokhu kuchaza ukuthi mancane amathuba okuthi liqede esicongweni kuleli qoqo, lizibekisele indawo eNdebeni yoMhlaba njengoba wonke amaqembu esesalelwe yimidlalo emibili.

Noma kunjalo, uChelle uthe usazoqhubeka nokusebenza kanzima ukuze athole indlela yokuthuthukisa iqembu lakhe.

"Indlela engibona ngayo ukuthi maningi amandla kuleli qembu. Kusobala ukuthi ngidinga ukuqhubeka nokusebenza nalo ngoba kukhona esikuqalile. Kumele abadlali bayiqonde ngokushesha indlela esifuna ukudlala ngayo uma siphethe ibhola nalapho lingekho kithina,” usho kanje ngemuva komdlalo neBafana ngoLwesibili.

ISuper Eagles isizobhekana neLesotho ekuhambeni ngo-Okthoba 6, bese itholana phezulu neBenin ekhaya ngo-Okthoba 13.

UChelle oseke wapheka iqembu lesizwe laseMali phambilini, uthe le midlalo basayithatha njengemqoka.

“Sidlala ibhola elikhokhelayo futhi ngiyazi ukuthi laba badlali bafuna ukuyinqoba le midlalo emibili esele. Okwamanje kunzima kithina ngoba besifuna ukuwunqoba umdlalo (neBafana) ukuze sikhuphule amathuba ethu futhi ngicabanga ukuthi senze konke. Kodwa-ke sinemidlalo emibili yokugcina okumele siyidlale esikhathini esingangenyanga kusukela manje,” uqhube kanje.

“Ziningi izinto ezingenzeka ngenyanga eyodwa. Kuzofanele siphinde sihlaziye lo mdlalo bese siyabona ukuthi yini esingayenza emidlalweni ezayo.”