OweBenin ubona belingana neBafana kweyokuhlungela eyoMhlaba

USABAMBELELE ekutheni iqembu lakhe liyalingana neBafana Bafana ngamaphuzu kweyokuhlungela iNdebe yoMhlaba yize i-log ingasho kanjalo umqeqeshi weBenin, uGernot Rohr.

Emizuliswaneni yakamuva yemidlalo yokuhlungela iNdebe yoMhlaba ezobanjelwa u-United States, Canada naseMexico ngonyaka ozayo, iBafana Bafana iguqise iLesotho ngo 2-0 ngoLwesihlanu yadlala ngokulingana ngo 1-1 neNigeria ngoLwesibili ebusuku.

Ngakolunye uhlangothi iBenin inqobe iZimbabwe ngo 1-0, yathela othulini iLesotho ngo 4-0 emidlalweni yayo emibili yakamuva.

Iqembu likaHugo Broos liqhwakele kuGroup C ngamaphuzu angu-17 emidlalweni eyisishiyagalombili, lilandelwe yiBenin enamaphuzu angu-14. 

INigeria isendaweni yesithathu ngamaphuzu angu-12, kulandele iRwanda ngamaphuzu alinganayo, iLesotho ngayisithupha neZimbabwe ngamane.

Ithemba likaRohr lincike odabeni oluqhubekayo oluthinta ukudlalisa kweBafana umdlali wasesiswini, uTeboho Mokoena, kungafanele ngesikhathi inqoba iLesotho ngo 2-0 ngoMashi.

Ngokwemithetho yeFifa, lo mdlali wayemisiwe kulandela ukuthola  amakhadi aphuzi emidlalweni emibili eyayandulela oweLesotho. 

Ngokujwayelekile iqembu elitholwa liphule lo mthetho liphucwa amaphuzu, anikezwe  elalibhekene nalo, kodwa iFifa ayikaze ithi vu ngalolu daba.

Nakuba kunjalo, uRohr usakholelwa ekutheni ukhona umlingo osazokwenzeka, ezakhe zizithole sezibambene ngamaphuzu angu-14 neBafana.

"Iqembu lami lenze obekufanele likwenze. Into ebesiyifuna kakhulu wukunqoba. Akulula neze ukunqoba imidlalo emibili elandelana eduze,” kusho uRohr ecashunwa yi-website yaseBenin, i-Actualites229, ekhuluma nezintatheli ngemuva komdlalo neLesotho.

“Kahlehle siyalingana neNingizimu Afrika okufanele iphucwe amaphuzu amathathu uma kulandelwa imithetho. Imithetho icacile kodwa iFifa isithathe isikhathi eside ingasikhiphi isinqumo. Akuqondakali ukuthi kungani ingakenzi njengenjwayelo. Uma konke kubuyela endleleni ejwayelekile kungasho ukuthi kusengenzeka noma yini.”

Kuzocaca ngo-Okthoba ukuthi yiliphi iqembu elizophuma kuleli qoqo lizibekisele indawo eNdebeni yoMhlaba nokuthi elizolala isibili lizobe linamaphuzu anele yini okulifaka kweminye imidlalo yokuhlunga.

IBafana izosonga imidlalo yokuhlunga yamaqoqo ngokubhekana neZimbabwe neRwanda, kanti yomibili imidlalo izodlalelwa eNingizimu Afrika. IBenin izogadulisana neRwanda neNigeria ekuhambeni.

"Yonke iminyango isavulekile. Iqembu lethu liyaqhubeka nomgqigqo omuhle. Lihlelekile, liziphatha kahle, libumbene futhi lidlala ngendlela ehambisana namasu esisuke siwalungiselele imidlalo,” uqhube kanje uRohr.

“Kukhona nomfutho omusha oqhamuka kubadlali abasebancane. Ngingenza isibonelo ngoRachid (Moumini) osebuyela ezingeni lakhe elihle kakhulu. Konke lokho kusinika ithemba kodwa kufanele sehlise umoya ngoba ngeke kube lula.”

IBenin yanqoba iRwanda ngo 1-0 neNigeria ngo 2-1 ngesikhathi ibhekene nalawa mazwe ekhaya kule midlalo yokuhlungela iNdebe yoMhlaba.