IDurban City izingela umgadli weChiefs
UMGADLI weKaizer Chiefs, uTashreeq Morris, okuqinisekisiwe ukuthi ufunwa yiDurban City
Image: Isithombe:BACKPAGEPIX
I-DURBAN City isilinde isinqumo seKaizer Chiefs ngomgadli, uTashreeq Morris, efuna azoxazulula inkinga yokushaywa kwamagoli kuleli qembu.
UMorris, ojoyine Amakhosi maphakathi nesizini edlule, ubukeka engasenayo indawo esikimini somqeqeshi, uNasreddine Nabi, kulandela ukusayinisa kwawo abanye abagadli abaseqophelweni eliphezulu. IChiefs isayinise u-Ethiosa Ighodaro obesemabhukwini eMamelodi Sundowns, Flavio Silva obedlala e-Indonesia noKhanyisa Mayo obegijima kwiCR Belouizdad yase-Algeria. Ngaphezu kwalokho, kubagadli kukhona uWandile Duba no-Ashley Du Preez asebekhombise izikhawu ukuthi bayalifuna ijezi eNaturena. UMorris akakaze adlale kwiChiefs selokhu kuqale isizini entsha yeBetway Premiership.
Kuvele ukuthi iCity engomakoti kwiBetway Premiership, ifuna ukuboleka uMorris kwiChiefs ngaphambi kokuvalwa kwewindi lokushintshana ngabadlali ngoSepthemba 22. Okwamanje leli qembu likaFarook Kadodia lishaya ngabagadli ababili okunguJoslin Kamatuka waseNamibia elimbuyise selimxoshile noJean Lwamba waseDemocratic Republic of Congo (DRC).
UKadodia ukuqinisekisile ukuthi bafuna uMorris obesebenza nomqeqeshi wabo, uGavin Hunt, kwiSuperSport United ngesizini edlule.
"Sisamfuna umgadli. Sisalinde iKaizer Chiefs ukuthi igcina ngokuthatha siphi isinqumo ngesicelo sethu sokuboleka uTashreeq Morris kule sizini," kushaya ngamafuphi uKadodia izolo.
ICity isiqale phansi ithungatha umgadli nje, kade isithembile ukuthi izosayinisa uPhakamani Mahlambi osekunesikhathi agcina ukubonakala ebholeni elikhokhelayo eMzansi. UMahlambi, owayeqeqeshwa nguHunt kwiBidvest Wits esemncane eminyakeni edlule, ubeziqeqesha neCity ngenhloso yokuthola inkontileka. Emasontweni adlule, uHunt uphumele obala ngokuthi kusezandleni zakhe lo mdlali odume ngophuzo oludakayo ukuthola inkontileka. Nokho ngesonto eledlule, kuvele ukuthi iCity isinqume ukungamsayinisi.
"Sizamile ukunika ithuba uPhakamani Mahlambi kodwa kwacaca ukuthi kusazothatha isikhathi ukuthi abe qatha, sagcina simkhulula," kusho uKadodia.
Emidlalweni eyisihlanu yokuqala yesizini yePremiership ka-2025/2026, iCity isishaye amagoli amathathu kuphela. Iwine imidlalo emibili, yadlala ngokulingana kwemibili, yahlulwa komunye.
Izobuyela ensimini ngomdlalo wasekhaya neSiwelele FC ngoSepthemba 16, eChatsworth Stadium, eThekwini.