UMayo emlandweni okhethekile esayina kwiChiefs
UMDLALI omusha weKaizer Chiefs, uKhanyisa Myo, ebhekene ne-Orlando Pirates kwiCaf Champions League esekwiCR Belouizdad yase-Algeria
Image: BACKPAGEPIX
UKUSAYINA kukaKhanyisa Mayo kwiKaizer Chiefs kumfaka ohlwini lwabadlali abakhethekile abanomlando wokudlubha umfaniswano waleli qembu laseNaturena ekubeni noyise walidlalela leli qembu.
Amakhosi ayiqale ngendlela ethembisayo isizini yeBetway Premiership, amemezele uMayo njengomdlali omusha ka-12 kusukela kuvuleke iwindi lokuhwebelana ngabadlali.
UMayo (27) osemabhukwini eCR Belouizdad yase-Algeria, ubolekwe ngaMakhosi ngesivumelwano sokuthi uzodlala kuwona kuze kuphele isizini ka-2025/2026.
Lo mdlali obekubukeka sengathi uyisithandwa e-Algeria, ubhedelwe yizinto kusukela kufike uSead Ramovic obeqeqesha i-TS Galaxy kuleli.
Ngokubona ukuthi akekho enhliziyweni kaRamovic ongazange ambhalise kubadlali azoya ngabo kwiCaf Champions League uMayo, uzicelele ukudedelwa.
UMayo oyindodana yomdlali wakudala weChiefs, uPatrick Mayo, uzwakalise injabulo enkulu ngokusayina kwakhe kwiChiefs akuchaze njengokubuyela ekhaya.
“Igazi lami liyimibala yeChiefs ngakho-ke ngijabule ukuthi ngizoba nani Makhosi amahle maduze,” usho kanje uMayo kwi-video ayiphanyeka emakhasini akhe ezokuxhumana kulandela ukuvumelana kwakhe neChiefs.
Ukufika kukaMayo omenyezelwe ngoLwesihlanu, kususa u-Aden McCarthy ekubeni ngumdlali wokugcina ohambe ezinyathelweni zikayise ngokudlalela iChiefs.
U-Aden uyindodana kaFabian McCarthy naye owayeyisitobha saMakhosi eminyakeni edlule. Ngomunye wabadlali abashaya into ecokeme odongeni lwaMakhosi angakangenelwa yigoli kule sizini emidlalweni yePremiership. Ngaphandle kukaMayo noMcCarthy, bakhona nabanye abadlali abalandele ezinyathelweni zoyise ngokudlubha ijezi laMakhosi okunguKaizer Motaung Junior oyindana kasihlalo waMakhosi, uKaizer Motaung owadlala kuleli qembu ngesikhathi esanda kulibumba. Abanye nguDoctor Khumalo owalandela ezinyathelweni zikayise, u-Eliakim "Pro'' Khumalo ngokudlalela iChiefs, Siphiwe Mkhonza owadlalela leli qembu ngemuva kweminyaka lidlalelwe nguyise uJoseph Mkhonza noMorgan Gould oyindodana kaSamuel Nkomo owayibamba eNaturena.
UMotaung Jnr uzwakalise injabulo enkulu ngoMayo ngesikhathi ekhuluma nethimba lezindaba laMakhosi.
“Sibambe ufishi omkhulu. Sazama ukumsayinisa ngaphambi kokuthi aye e-Algeria, ngakho-ke lokhu kuwumvuzo wokuqhubeka kwethu nokuzama ngisho sekubukeka sengathi ngeke kwenzeke,” kusho uMotaung.
UMayo uzofika kwiChiefs nethemba lamagoli kwazise ubewaqhulula kwiCape Town City ayishiye ngo-2024. Kumasizini adlule, ucazelane noPeter Shalulile ngomklomelo womdlali oshaye amagoli amaningi kwiligi, iBetway Premiership Top Goal Scorer.