Isonto elibucayi ku-Ouaddou nePirates ebheke oweMTN8
UMQEQESHI we-Orlando Pirates u-Abdeslam Ouaddou (kwesokudla) nephini lakhe uMandla Ncikazi (kwesokunxele).
Image: BACKPAGEPIX
UMQEQESHI u-Abdeslam Ouaddou neqembu lakhe i-Orlando Pirates banenselelo enzima kuleli sonto elizayo njengoba belungiselela umdlalo wamanqamu weMTN8 abazowudlala neStellenbosch FC.
Lo mdlalo wamanqamu, ozobe ungowokuqala weZimnyama ngaphansi kwesandla salo mqeqeshi waseMorocco selokhu ethathe izintambo ngaphambi kokuthi kuqale isizini, uzodlalelwa eMbombela Stadium, eMpumalanga, ngoMgqibelo ngo-6 ntambama.
Kulindeleke ukuthi ushise kwazise kuzohlangana amaqembu abebhekene kowamanqamu kuwona lo mqhudelwano ngesizini edlule, kwanqoba iPirates ngo 3-1.
Nokho, sekukhona nezinye izimo eziholelele ekutheni izinto zibe nzima kakhulu ku-Ouaddou naleli qembu lase-Orlando.
Ngasekuqaleni kwaleli sonto, iPirates ikhiphe isitatimende iveza ukuthi umqeqeshi namanye amalungu amahlanu eqembu babandakanyeke engozini yemoto ngeSonto bebuya emdlalweni weligi neChippa United, kwadingeka ukuthi balashwe esibhedlela.
Yize leli qembu lingazange liyikhiphe eminye imininingwane mayelana namanye amalungu eqembu alimale kulesi sigameko nokuthi balimele kangakanani, akungatshazwa ukuthi lokhu kuzoba nomthelela emalungiselelweni eqembu ngaphambi komdlalo wamanqamu.
Phezu kwalokho, lizoqala ukuzilungiselela ngaphandle kwenqwaba yabadlali abawumgogodla weqembu abakwiBafana Bafana, umqeqeshi uHugo Broos, alithakele imidlalo emqoka yokuhlungela iNdebe yoMhlaba.
Laba badlali ngunozinti uSipho Chaine, Mbekezeli Mbokazi, Thalente Mbatha, Oswin Appollis, Kamogelo Sebelebele, Relebohile Mofokeng noSipho Mbule obizwe ukuzovala isikhala sikaPatrick Maswanganyi olimele.
Omunye oyisethenjwa ongekho nguDeon Hotto, oseqenjini lesizwe laseNamibia nalo elidlala eyokuhlungela iNdebe yoMhlaba.
Njengoba womabili lamaqembu esizwe edlala ngoLwesibili, laba badlali abangekho kulindeleke ukuthi babuye ngoLwesithathu. Kusazocaca ngokuhamba kwesikhathi ukuthi bazobuya bekusiphi isimo.
Nakuba iPirates isiqalile ukuqoqa amaphuzu kwiBetway Premiership kodwa isekhona ingcindezi kumqeqeshi wayo omusha kulandela ukuyiqala ngebatha imidlalo yeligi, benqotshwa kwemibili ilandelana, bedlala neSekhukhune United noMarumo Gallants.
Ukunqoba eyakamuva yeligi babhekene neStellenbosch, Orbit College neChippa, kanye nokufinyelela kowamanqamu weMTN8 ngokukhipha izimbangi iMamelodi Sundowns kowandulela owamanqamu, kuwehlisile umoya kubalandeli bezikaMagebhula kodwa izinto zingaphinde zishintshe uma zihluleka ukuvikela indebe yeMTN8.
Umqeqeshi obepheka iqembu ngaphambi kuka-Ouaddou, uJose Riveiro, wayinqoba kathathu kulandelana iMTN8.
Amehlo azobe ethe njo kulo mqeqeshi neqembu lakhe, kubhekwe ukuthi bazokwazi yini ukuqhubeka nomgqigqo wokuvula isizini ngokuphakamisa indebe yeMTN8 noma abalandeli bePirates bazophuma bedumele eMbombela Stadium.