Inselelo kuBroos ngezithenjwa zakhe kwiBafana
UMQEQESHI weBafana Bafana, uHugo Broos, ubhekene nenkinga yokubophela isikwati esiqinile njengoba kubuya eyokuhlungela iNdebe yoMhlaba
Image: BACKPAGEPIX
KUFANELE ukuba kuqothuka izinwele kumqeqeshi weBafana Bafana, uHugo Broos, ecabanga ngesikwati azosibophela emidalweni emibili yokuhlungela iNdebe yoMhlaba ezoyidlala neLesotho neNigeria, ngokwahlukana njengoba izithenjwa zakhe zilimele, zehlelwe yifomu, ezinye zingakaze zilithinte ibhola kule sizini.
Okudalela lo mqeqeshi waseBelgium le nkinga wukuthi iBafana isethubeni lokuzibekisela indawo kwiNdebe yoMhlaba yangonyaka ozayo kodwa okuningi kulele kwimiphumela ezoyithola kwiLikuena nakwiSuper Eagles.
IBafana izobhekana neLesotho ngoSepthemba 5, eFree State Stadium, ilandelise ngeNigeria ngoSepthemba 9, kuyona le nkundla. Yomibili imidlalo izoqala ngo-6 ntambama.
Namuhla ngo-12.30 emini, uBroos uzomemezela isikwati sadlali abangu-23 esizothwala amathemba eNingizimu Afrika okudlala koweNdebe yoMhlaba ngonyaka ozayo eMexico, Canada nase-United States of America (USA).
Lesi sikwati sikaBroos singezinye zezimqoka kwazise abadlali abazobe bekusona yibona abayobalwa nabayisa leli qembu lesizwe kweyoMhlaba. Lo mqeqeshi unezinselelo eziningi ngabanye babadlali ajwayele ukubabiza kwiBafana.
Kunenkinga yokulimala kwabadlali abamqoka kuBroos njengoThemba Zwane, Nkosinathi Sibisi noRelebohile Mofokeng muva nje. Kwenzeka lokhu nje, uPatrick Maswanganyi (okwathiwa uzovala isikhala sikaZwane) noGrant Kekana behlelwe yifomu.
Ngaphandle kwabalimele, kukhona okubalwa kubona uKhuliso Mudau obuyele ejimini yeMamelodi Sundowns ngoLwesibili, emuva kwamasonto ehlezi ekhaya ngenxa yokungavumelani neqembu ngenkontileka entsha neholo okufanele alithole.
Baningi abanye abanezinkinga ezahluleke njengoFawaaz Basadien osuke kwiStellenbosch FC edlala kodwa limeqa ekhona kulezi zinsuku kwiSundowns.
Isimo sikaBasadien sifake enkingeni uBroos kwazise kukhona nabasefomini enhle kulezi zinsuku njengoMalibongwe Khoza osanda kudlala kahle kwiCHAN nabanye esingabala kubona uKamogelo Sebelebele noMbekezeli Mbokazi be-Orlando Pirates okuzobanzima ukuthi lo mqeqeshi ukubashiya ngaphandle.
IBafana iqhwakele kuGroup C ngamaphuzu angu-13 ngemuva kwemidlalo yamaqoqo eyisithupha. IRwanda neBenin basendaweni yesibili kwi-log lapho besele khona kwiBafana ngamaphuzu ayisishiyagalombili.
Nokho, kusenendaba yephutha leSouth African Football Association (Safa) lokudlalisa uTebogo Mokoena kungafanele koweLesotho odlule. Okusobala wukuthi iNigeria iyona efisa ukuthi iBafana iphucwe amaphuzu eyawathola ngokudlalisa uMokoena.
INigeria isendaweni yesine kwi-log ngamaphuzu ayisikhombisa okuchaza ukuthi ukunqoba kweBafana kule midlalo emibili elandelayo kungayisondeza nalo mqhudelwano eyawugcina iwusingethe ngo-2010.
Lesi sikwati sikaBroos singezinye sezimqoka kwazise abadlali abazobe bekusona yibona abayobalwa nabayisa leli qembu lesizwe kweyoMhlaba.