Impinda yePirates neStellies kowamanqamu weMTN8

I-Orlando Pirates neStellenbosch FC bazophinde badudulane kowamanqamu weMTN8 kulandela ukudlula kwabo kweyandulela owamanqamu esongwe ngoMgqibelo.

IPirates inqobe iMamelodi Sundowns ngo 4-1 sekukhahlewa amaphenathi eLucas Moripe Stadium, e-Atteridgeville, kwathi iStellies yadlula ngo 3-1 kwiSekhukhune United.

AmaBhakabhaka neStellies yibona abadlala kowamanqamu kulo mqhudelwano ngesizini edlule, kwanqoba iPirates ngo 3-1.

Ezimnyama zingene emlenzeni wesibili wowandulela owamanqamu neMamelodi Sundowns amaqembu ebambene ngo 1-1 ngemva komlenze wokuqala odlalelwe e-Orlando Stadium.

Nakulokhu amaBrazilian ayibhakuzise kuqala inethi ngonyawo luka-Iqraam Rayners umdlalo usanda kuqala, ezikaMagebhula zabuya ngegoli likaKamogelo Sebelele esiwombeni sesibili.

Ukuphela kwalo mdlalo ngo 1-1 kusho ukuthi la maqembu abesabambene ngo 2-2 uma kuhlanganiswa imilenze yomibili.

Kuthe sekuhlahle amaphenathi unozinti wePirates, uSipho Chaine, wavimba amabili, iqembu lase-Orlando ladlula ngi 4-1.

“Umdlalo ubunzima njengoba besilindele, ikakhulukazi njengoba sisheshe sangenelwa yigoli. Asiqalanga kahle kodwa sikwazile ukuphinde sibuye esiwombeni sesibili saze sanqoba ngamaphenathi,” kusho umqeqeshi weZimnyama u-Abdeslam Ouaddou.

“Abantu abaningi bathi amaphenathi ahamba ngenhlanhla kodwa akunjalo. Kufanele nizilungiselele futhi sikwenzile lokho emasontweni adlule. 

“Ngibajabulele abadlali, abalandeli nosihlalo weqembu. Umndeni wakwaKhoza wenza umsebenzi omkhulu kuleli qembu. Akusho lutho ukufinyelela kowamanqamu uma sigcina singawunqobanga. Kufanele sifike siwunqobe.”

IStellies ingene emlenzeni wesibili neBabina Noko ihamba phambili ngo 2-0 kulandela ukunqoba kwayo umlenze wasekhaya.

Leli qembu likaSteve Barker liphinde lasikweletisa kakhulu iSekhukhune ngesikhathi uMthetheleli Mthiyane elibeka phambili ePeter Mokaba Stadium, ePolokwane.

Nakuba uSiphesihle Mkhize etholele iSekhukhune igoli lokulinganisa maphakathi nesiwombe sesibili, bese kunzima ukuthi leli qembu liphinde lishaye amanye amagoli amathathu ebese liwadinga ukuze lidlulele phambili.

“Bengazi ukuthi uma sishaya igoli kuqala kuzoba nzima ukuthi bathole amagoli amane. Siqale umdlalo ngenhloso yokuthi sithole leli goli futhi ngiyajabula ukuthi sikwazile ukukwenza lokho, sasenzela izinto zaba lula,” kusho uBarker.

“Njengabaqeqeshi nabadlali sifuna ukungena emidlalweni yamanqamu ukuze sizibeke ethubeni lokunqoba izicoco eziningi. Ngicabanga ukuthi sonke sizikhandla ngoba sifuna ukuba nezindondo nezindebe esizozikhombisa abazukulu bethu ngelinye ilanga.

“Kuyisifiso sethu ukuthi siphakamise indebe yeMTN8 futhi manje sesisalelwe wumdlalo owodwa.”

IPremier Soccer League isazomemezela ukuthi lo mdlalo wamanqamu weMTN8 uzodlalwa nini nokuthi uzodlalelwa kuyiphi inkundla.