UCardoso nenselelo yokuketula iPirates kwiMTN8
UMQEQESHI weMamelodi Sundowns, uMiguel Cardoso, ufisa ukuqeda irekhodi laleli qembu lokungenzi kahle emiqhudelwaneni yasekhaya yomkhumulajezi kumasizini amathathu adlule.
Image: BACKPAGEPIX
UBHEKENE nomsebenzi wokuqeda ukucanasa kwe-Orlando Pirates kwiMTN8 umqeqeshi weMamelodi Sundowns, uMiguel Cardoso, njengoba la maqembu ezohlangana emlenzeni wesibili womdlalo wowandulela owamanqamu kusasa ngo-3 ntambama.
EZimnyama seziwunqobe kathathu kulandelana lo mqhudelwano womkhumulajezi wokuvula isizini, kanti sezibe ngompetha amahlanda amane kumasizini amahlanu adlule.
Iqembu elagcina ukuwaphazamisa iyona iSundowns ngesikhathi idla lesi sicoco ngo-2021.
UCardoso neqembu lakhe bazibeke ethubeni lokudlulela kowamanqamu kulo mqhudelwano ngesikhathi bedlala ngokulingana ngo 1-1 kowomlenze wokuqala e-Orlando Stadium ngoMgqibelo odlule.
AmaSandawana agadle kuqala kulo mdlalo ngegoli likaTeboho Mokoena kodwa iPirates yabuyiswa emdlalweni nguKamogelo Sebelebele seliyoshona.
Ngaphandle kokuthi ezikaMagebhula ziyiqukule kathathu indebe yeMTN8 eminyakeni emithathu edlule ziqeqeshwa nguJose Riveiro, lo mqeqeshi waseSpain ubengayizwa iSundowns uma behlangene emidlalweni yomkhumulajezi.
Kwaqala kowandulela owamanqamu weMTN8 ngo-Okthoba ka-2022, lapho la maqembu abambana khona ngo 0-0 e-Orlando Stadium, kwathi kowesibili owawusePeter Mokaba Stadium, iPirates yanqoba ngo 3-0.
Aphinde bahlangana kowamanqamu kuwona lo mqhudelwano ngo-Okthoba ka-2023, eThekwini, zabambena ngo 0-0 ngaphambi kokuthi eZimnyama zinqobe ngo 3-1 kumaphenathi.
Kwaphinde kwakhonya iqembu lase-Orlando ngesikhathi etholana phezulu kowamanqamu weNedbank Cup ngoJuni ka-2024, iphuma phambili ngo 2-1 eMbombela Stadium.
UCardoso, othathe izintambo kwiSundowns noDisemba, uyixebule ngo 4-1 iPirates koweligi eLoftus Versfeld Stadium ngoFebhuwari, ngaphambi kokuthi imshaye ngo 2-1 e-Orlando ngoMashi.
Uthe uyabuqonda ubumqoka bokuwina indebe yomkhumulajezi kwazise sekunesikhathi iSundowns yagcina ukuyiqukula eyasekhaya.
"Kubalulekile ukunqoba izindebe futhi iqembu elifana neMamelodi Sundowns kufanele lifike emidlalweni yamanqamu kuyona yonke imiqhudelwano. Mina nabadlali bami sinawo amandla okunqoba lo mqhudelwano. Usekuqaleni kwesizini ngakho-ke wonke umuntu uyakuthokozela ukuqala ngegiya eliphezulu. Kuletha umfutho omusha," kusho uCardoso.
“Iqiniso wukuthi elinye lamaqembu amabili amqoka eNingizimu Afrika lizophuma, impilo iqhubeke. Asifuni lokho kwenzeke kithina, yingakho sizosebenzisana neqembu ukuze siqhamuke namaqhinga azovumela abadlali ukuthi bakhululeke umdlalo uze uyophela.
“Asikubheki osekudlulile, sigxila ezifisweni ezinkulu esinazo njengamanje njengeqembu. Umdlalo olandelayo yiwona obalulekile futhi uma senza izinto ngendlela sizodlula sidlale kowamanqamu.
"Ngeke kube lula ngoba sizobe sibhekene nelinye iqembu elizobe lilwela into efanayo. Ake sibone ukuthi ngubani ozoqina kakhulu kodwa ngiyethemba ukuthi kuzoba yiMamelodi Sundowns."
Iqembu elizonqoba phakathi kweSundowns nePirates lizobhekana nelizodlula phakathi kweStellenbosch FC neSekhukhune United kowamanqamu.
IStellies izongena emlenzeni wesibili ozoba sePeter Mokaba Stadium kusasa ngo-6 ntambama ihamba phambili ngo 2-0.