OweBay nethemba lokuguqula isimo eMhlathuze

UKHOLWA wukuthi ukudlalela enkundleni yabo iRichards Bay Stadium umdlalo wabo olandelayo weBetway Premiership kuzobanikeza umfutho abawudingayo ukuze baphume ebumnyameni abakubona umqeqeshi weRichards Bay FC, uRonnie Gabriel.

INatal Rich Boyz, ebiyidlalela eThekwini imidlalo yayo yasekhaya kumasizini adlule ngesikhathi kusalungiswa inkundla yayo eseMhlathuze, izotholana phezulu neChippa United ngoLwesibili ngo-7.30 ebusuku.

Leli qembu eliphekwa nguGabriel ngokubambisana noPapi Zothwane, lizongena kulo mdlalo libheke ukuvuka kulandela ukukhala ngaphansi emidlalweni yalo emine yokuvula isizini.

Linqotshwe yiMamelodi Sundowns ngo 4-0 kuma-quarterfinal eMTN8, lashaywa yiMarumo Gallants ngo 2-1, iLamontville Golden Arrows ngo 1-0 neKaizer Chiefs ngo 1-0 kweyeligi.

“Kuzosho lukhulu kithina ukudlalela ekhaya sisebenzise abalandeli bethu njengomdlali ka-12. Siyakubona ukwesekwa amanye amaqembu akuthola ekhaya nokuthi kuwenza adlale kahle kanjani. Kuzofana nakithi,” kusho uGabriel.

"Sinabalandeli abanothando ekhaya futhi bazoliqinisa iqembu. Bazosinika umfutho esiwudingayo emdlalweni olandelayo nethuba elikhulu lokuqoqa amaphuzu amathathu ekhaya."

Lo mqeqeshi uvumile ukuthi izinto azikahambi ngendlela abebehlose ngayo kodwa uthe kukhona okuhle asebekubonile eqenjini, ikakhulukazi njengoba iqembu ligqishe kakhulu ngabadlali abasebancane.

“Asiyiqalanga kahle isizini. Alikho iqembu elisuke lihlose ukuqala isizini ngale ndlela. Emidlalweni emibili yokuvula isizini iqembu liwakhile amathuba noma sigcine sinqotshiwe. Kowesithathu asihlaselanga ngendlela ebesifisa ngayo,” uqhube kanje lo mqeqeshi.

“Besifuna ukuvula isizini ngokuqoqa amaphuzu kodwa kufanele sikhumbule ukuthi sinabadlali abaningi abancane esisabajwayeza ubunzima bokudlala esigabeni esiphezulu. Siyathemba ukuthi izinto zizohlangana njengoba siqhubekela phambili.

“Awukho umgomo otheni esibekelwe wona ngaphandle kokuthi iqembu lithuthuke kulokhu elikwenze ngesizini edlule, liqede endaweni engcono."