U-Ouaddou ucacise ngokuqinisa isikimu koweStellies
UMQEQESHI we-Orlando pirates ubezibophele izethenjwa eqenjini elinqobe iStellenbosch FC koweBetway Premiership ngoLwesithathu ebusuku.
Image: BACKPAGEPIX
INGCINDEZI yokucosha amaphuzu okuqala kwiBetway Premiership iyona eholele ekutheni umqeqeshi we-Orlando Pirates, u-Abdeslam Ouaddou, abophele isikimu esiqinile emdlalweni weBetway Premiership neStellenbosch FC ngoLwesithathu ebusuku.
Yize Ezimnyama zizodlala umdlalo obucayi womlenze wesibili owandulela owamanqamu weMTN8 neMamelodi Sundowns eLucas Moripe Stadium ngoMgqibelo ngo-3 ntambama, lo mqeqeshi ubuye neqembu elithi alifane naleli eliqale emlenzeni wokuqala ngesikhathi benqoba iStellies ngo 1-0 e-Orlando Stadium.
EzikaMagebhula beziwadinga ephelele amaphuzu kulandela ukuguqiswa yiSekhukhune United ngo 1-0 neMarumo Gallants ngo 2-1 kwemibili yokuvula yeligi.
Igoli elishaywe nguKamogelo Sebelebele esiwombeni sokuqala liqinisekise ukuthi leli qembu lase-Orlando lihamba nawo ephelele amaphuzu, lasuka nasendaweni ebelikuyona ngasemsileni we-log.
IMamelodi Sundowns yona ishintshe abadlali abangu-10 eqenjini eliqumbe phansi iMagesi FC ngo 2-0 ngoLwesithathu ebusuku, kodwa u-Ouaddou uthe bebengeke bakwazi ukugembula ngaleyo ndlela.
“Bekufanele sibheke okumqoka ngenxa yendawo ebesikuyona. Obekubaluleke kakhulu bekuwukuthola amaphuzu amathathu, sibe namaphuzu nathi ekuqaleni kwesizini,” kusho lo mqeqeshi.
“Kuyiqiniso ukuthi sinomdlalo omqoka ozayo kodwa ebholeni ngesinye isikhathi kufanele uqale ngalokhu okubalulekile osuke ubhekene nakho ngaleso sikhathi. Besingeke sikwazi ukucabanga ngomdlalo olandelayo singakadluli kulo (neStellies) ngoba bekufanele nakanjani sinqobe.”
U-Ouaddou uthe ugculisekile ngendlela iqembu lakhe elivuke ngayo labuya namaphuzu amathathu, yize ebefisa ukuthi lithole amagoli athe xaxa.
“Sijabule ngalo mphumela ngoba yinto ebesiyilindele selokhu kuqale isizini. Umdlalo siwuqale ngendlela ebesifisa ngayo, sayicindezela iStellenbosch ukuze ingakwazi ukuliqala emuva ibhola, saphinde sathola inqwaba yamathuba,” uqhube kanje lo mqeqeshi.
“Engingakuthandanga wukuthi kukhona imizuzu engu-20 kuya ku-25 esiwombeni sesibili lapho sihlulekile khona ukulawula umdlalo. Kunezikhathhi ezibucayi emdlalweni lapho kufanele sifunde khona ukushaya amagoli amabili noma amathathu azoqinisekisa umphumela.
“Noma kunjalo, akufanele sigxeke kakhulu, asijabulele amaphuzu ethu okuqala bese siyathemba ukuthi lokhu kukhomba ukuthi isizini yethu seyiqalile ngempela."