Kwehle ingcindezi kwiPirates icosha amaphuzu kwiBetway
UTHALENTE Mbatha we-Orlando Pirates ebongela uKamogelo Sebelebele ngegoli elibanqobise iStellenbosch FC ngo 1-0 izolo ebusuku.
Image: BACKPAGEPIX
IBUYISE ithemba kubalandeli i-Orlando Pirates ngokunqoba umdlalo wayo wokuqala kwiBetway Premiership, iguqisa iStellenbosch FC ngo 1-0 e-Orlando Stadium izolo ebusuku.
Igoli elitholele eZimnyama amaphuzu okokuqala kule sizini ka-2025/26 liqhamuke ngenguzunga yeshodi ebekwe enethini nguKamogelo Sebelebele ngomzuzu ka-15.
Bekungokwesibili kulandelana lo mdlali osuka kwiTS Galaxy ebhakuzisa inethi, kwazise nguyena oshayele ezikaMagebhula igoli lokulinganisa zibambana ngo 1-1 neSundowns kwiMTN8 ngempelasonto.
IPirates ibiwudinga lo mphumela ngemuva kokuguqiswa yiSekhukhune United ngo 2-1 neMarumo Gallants ngo 1-0 kweyokuvula yeligi.
Umqeqeshi u-Abdeslam Ouaddou wenze ushintsho olulodwa eqenjini eliqale bebambana ngo 1-1 neMamelodi Sundowns emlenzeni wokuqala womdlalo owandulela owamanqamu weMTN8, efaka u-Oswin Appollis endaweni kaPatrick Maswanganyi.
Ukunqoba kweZimnyama kuzisuse ngasemsileni we-log, kwazibeka endaweni ka-11 ngamaphuzu amathathu emidlalweni emithathu.
Ukulimala kukaDeano van Rooyen esiwombeni sokuqala kusho ukuthi u-Ouaddou kuzomele abheke kuBandile Shandu noma uTshepo Mashiloane, abadlale emuva kwesokudla emidlalweni yokuvula isizini, uma esehlanganisa iqembu elizobhekana namaBrazilian kowomlenze wesibili owandulela owamanqamu weMTN8 ngoMgqibelo ePitoli.
ISundowns nayo izongena kulo mdlalo wangoMgqibelo izethemba kulandela ukunqoba iMagesi FC ngo 2-0 koweligi eSeshego Stadium izolo ebusuku.
AmaSandawana alishintshe lonke iqembu eliqale kowomlenze wokuqala weMTN8 nePirates ngaphandle kukanozinti uRonwen Williams.
Athwale kanzima esiwombeni sokuqala iMagesi ifika ifikile emapalini kaWilliams kodwa ibhola lingavumi ukungena enethini.
Nokho, abuye ngamandla esiwombeni sesibili awathola amagoli aqede umfutho weDikwena Tsa Meetse.
Elokuqala likhahlelwe nguJayden Adams, kwathi uDelano Abrahams ezama ukulikhipha kulayini langena phakathi.
Elesibili livalelwe phakathi nguPeter Shalulile, ofice irekhodi likaSiyabonga Nomvethe lamagoli angu-129 esigabeni esiphezulu ebholeni lakuleli.
AmaSandawana akhuphukele endaweni yesithathu kwi-log ngamaphuzu ayisikhombisa emidlalweni emithathu.
Kuzocaca ngoMgqibelo ukuthi ukuphumuza abadlali kweSundowns kuzoyisebenzela yini uma isibhekene nePirates eLucas Moripe Stadium ngo-3 ntambama.