Iyaqhubeka nokushosholoza inqola yeChiefs

I-KAIZER Chiefs izongena emdlalweni weBetway Premiership obhekwe ngabomvu neMamelodi Sundowns isashosholoza kulandela ukuqumba phansi iRichards Bay ngo 1-0 emdlalweni wayo wesithathu weligi obuseFNB Stadium, izolo ebusuku.

Igoli elisize Amakhosi aqhubeka nokuqoqa amaphuzu lishaywe nguGaston Sirino maphakathi nesiwombe sesibili.

Amakhosi asenqobe imidlalo emithathu yokuvula iligi ilandelana, okuyinto agcina ukuyenza ngesikhathi eyiwina ngesizini ka-2014/2015. 

Leli qembu liyivule ngegiya eliphezulu iligi liguqisa iStellenbosch FC ngo 2-0 nePolokwane City ngo 1-0.

Lisaholwa ngamaphini omqeqeshi uKhalil Ben Youssef noCedric Kaze ngenxa yokuthi uNasreddine Nabi usabambeke eTunisia kulandela ukulimala komkakhe sekusele kancane kuqale isizini.

INatal Rich Boyz yona ingene kulo mdlalo inengcindezi yokuthola okuthile kuwona ngemuva kokunqotshwa yiMarumo Gallants ngo 2-1 neLamontville Golden Arrows ngo 1-0.

Nakuba iChiefs ibibonana kangcono enkundleni uma iphethe ibhola esiwombeni sokuqala, iminyakazo yayo eminingi ibibhuntsha uma isisondele ngasebhokisini, kwayiwa ekhefini zibambene ngo 0-0.

Leli qembu lasePhefeni liphinde labhekwa yisambane ngesikhathi lilinyalelwa isitobha u-Aden McCarthy ngasekupheleni kwesiwombe sokuqala, indawo yaso yathathwa nguZitha Kwinika.

Lo mdlali obegijima eqenjini elincane elidlala kwiDStv Diski Challenge, ubeqokwe njengomdlali ovelele emidlalweni emibili yokuvula isizini lapho Amakhosi ebuye khona namaphuzu aphelele.

Ukulimala kwakhe kungase kuqongise izinkinga kubaqeqeshi beChiefs njengoba ezinye izitobha ezidlala maphakathi, uRushwin Dortley noGiven Msimango, bezingakadlali kule sizini ngenxa yokulimala.

Izinguquko ezenziwe yiChiefs ngesikhathi kubuywa ekhefini, ifaka uSirino noNkosingiphile Ngcobo ezikhaleni zikaSiphesihle Ndlovu noSibongiseni Mthethwa, ziholele ekutheni leli qembu liyicindezele kakhulu iBay, kwaze kwaqhamuka negoli.

Ziphinde zakhombisa ukuthi abaqeqeshi sebeliqonda kangcono iqembu labo nalapho kufanele bashintshe khona uma izinto zingahambi nendlela abafisa ngayo.

Amakhosi asasendaweni yesibili kwi-log ngamaphuzu ayisishiyagalolunye emidlalweni emithathu. Ayalingana neqembu eliqhwakele, iSekhukhune United, elinesibalo esithe xaxa samagoli kulandela ukuxebula omakoti i-Orbit College FC ngo 3-0 izolo.

IChiefs neSundowns bazotholana phezulu eFNB Stadium ngo-7.30 ebusuku ngoLwesithathu oluzayo.

Nakuba iBay idlale kangcono uma kuqhathaniswa nasemidlalweni evule ngayo kwiMTN8 nakwiligi kodwa kuvelile ukuthi usemningi umsebenzi okufanele wenziwe abaphathi nabaqeqeshi ukuze baliqinise kwazise libophele kakhulu abadlali abasebancane.

INatal Rich Boyz, esemsileni we-log ngeqanda, isizobhekana neChippa United eRichards Bay Stadium, ngoLwesibili ngo-7.30 ebusuku.