UNabi uzobuya ngoweDowns ezokhwezela ibhodwe lakhe kwiChiefs
UMQEQESHI weKaizer Chiefs uNasreddine Nabi (kwesokunxele) nelinye lamaphini akhe uKhalil Ben Youssef (kwesokudla).
Image: BACKPAGEPIX
I-KAIZER Chiefs inethemba lokuthi umqeqeshi wayo uNasreddine Nabi uzobuya kuleli sonto azozibambela mathupha njengoba seyizolungiselela umdlalo wayo olandelayo weBetway Premiership neMamelodi Sundowns.
Lo mqeqeshi waseTunisia ubengekho emidlalweni emithathu yokuvula isizini njengoba kudingeke ukuthi aphuthume ekhaya kulandela ukulimala komkakhe.
Kuleyo midlalo Amakhosi aqoqe amaphuzu aphelele, eshaya iStellenbosch FC ngo 2-0, iPolokwane City ngo 1-0 neRichards Bay FC ngo 1-0, eholwa amaphini akhe uKhalil Ben Youssef noCedric Kaze.
Njengamanje iChiefs isendaweni yesibili kwi-log ngamaphuzu ayisishiyagalolunye kanti isizobhekana nesivivinyo esinzima uma isigadulisana nompetha, amaBrazilian, eFNB Stadium ngoLwesithathu oluzayo.
“UNabi uzobe enathi, ngiyethemba ukuthi kuleli sonto uzobuya azolungiselela umdlalo olandelayo neSundowns,” kusho uBen Youssef ngemuva kokunqoba iRichards Bay ngoLwesibili ebusuku.
UBen Youssef noKaze bebelokhu begcizelela ukuthi bebexhumana noNabi ngesikhathi esekhaya, yize ebebethemba ukuthi bathathe izinqumo ezibalulekile mayelana nokuqokwa kwesikwati kanye nezinhlelo zemidlalo.
Kuzobonakala ukuthi ukubuya kwakhe kuzofika nezinguquko ezinjani eqenjini elizodlala neSundowns nasemiphumeleni emihle leli qembu ebelilokhu liyithola ngesikhathi engekho.