ISharks ethubeni lokuvuka koweCurrie Cup eClermont

 IHOLLYWODBETS Sharks XV izowudlalela eClermont kusasa umdlalo ezobe ihlose ukuvuka ngawo kwiCurrie Cup kulandela ukuvula isizini ngebatha. 

Leli qembu eliphekwa yinkakha uJP Pietersen lizodudulana neToyota Free State Cheetahs eSugar Ray Xulu Stadium ngo-5.10pm.

Nakuba livikela indebe elayinqoba ngesizini edlule, lizongena kulo mdlalo walo wesithathu wamaqoqo limidwayidwa kulandela isibhaxu elisitholile kwemibili ekuhambeni. 

Kowokuqala lixetshulwe yiFidelity ADT Lions ngo 46-3 e-Ellis Park, ngaphambi kokuthi libhubhudlwe iVodacom Bulls ngo 64-0 eLoftus. 

Lo mdlalo wakusasa uyingxenye yezinhlelo zeSharks zokusondeza umdlalo wombhoxo ezindaweni ezahlukene. 

Ngaphandle kokudlalela eClermont kusasa, leli qembu lizobhekana neBoland Kavaliers eWoodburn Stadium, ePietermaritzburg, ngo-Agasti 30.

Kuzongenwa mahhala kuyona yomibili le midlalo. 

"Le midlalo eyokubungaza umoya omangalisayo nothando olutholakala emiphakathini yethu. Kuyasijabulisa ukubona abalandeli bendawo bephuma ngobuningi babo bezokweseka abadlali bethu futhi bakhombise amandla nokuzwana kwesiqubulo sethu esithi #WarriorNation," sisho kanje isitatimende seSharks. 

Yize  uPietersen eqhubekile nokubophela abadlali abasebancane eqenjini elizodlala neCheetahs kodwa uthe ukuliqinisa ngabanamava emuva. 

UYaw Penxe uzoqala ophikweni, uMarnus Potgieter noDiego Appollis babambisane maphakathi, bese uJaco Williams eyibamba emuva kwi-fullback. 

Umdlali wamaJunior Springboks owenze ezibukwayo ngesikhathi enqoba i-World Rugby Under-20 Championship ngenyanga edlule, uVusi Moyo, uzoqala umdlalo wakhe wokuqala, evala isikhala sikaJean Smith kwi-flyhalf. 

Iqembu leHollywoodbets Sharks XV elizobhekana neCheetahs

Abazoqala: 1. Phatu Ganyane, 2. Jacques Marais, 3. Lee-Marvin Mazibuko, 4. Gideon Koegelenberg, 5. Corne Rahl, 6. Tino Mavesere, 7. Matt Ramao, 8. Nick Hatton, 9. Bradley Davids, 10. Vusi Moyo, 11. Yaw Penxe, 12. Marnus Potgieter, 13. Diego Appollis, 14. Phiko Sobahle, 15. Jaco Williams, 

Abasebhentshini: 16. Willem van den Hever, 17. Simphiwe Ngobese, 18. Dian Heunis, 19. Coetzee Le Roux, 20. Jannes Potgieter, 21. Ceano Everson, 22.Jean Smith, 23. Albie Bester