USENGCUPHENI yokuphunyukwa yithuba lokuqopha umlando okhethekile kwiPremier Soccer League (PSL) umgadli weMamelodi Sundowns, uPeter Shalulile, okuvela ukuthi angase alishiye leli qembu laseChloorkop.
UShalulile waseNamibia, wajoyina iSundowns ngo-2020 esuka kwiHighlands Park eseyadayiswa. Wafika kwiSundowns waphenduka umshini wamagoli, eshaya inethi ephindelela amasizini elandelana. Uphethe irekhodi lokuwina kathathu umklomelo womdlali oshaye amagoli amaningi emidlalweni yeligi ngesizini, iBetway Premiership Top Goal Scorer. Wawudla lo mklomelo ngesizini ka-2019/2020 ewuhlukaniselana noGabadinho Mhango waseMalawi ngamagoli angu-16 umdlali ngamunye. Wawuphinda ngesizini ka-2021/2022 eqeda isizini eshaye angu-23 ngaphambi kokuwuhlukaniselana noKhanyisa Mayo ngeka-2022/2023 beshaye angu-12 ngamunye. Isizini edlule ngeyokuqala uShalulile ashaye kuyona amagoli ambalwa kwazise ushaye ayisithupha kuphela emidlalweni engu-24.
Mhlawumbe yikhona lokhu okuholele ekutheni angamuzwa kahle umqeqeshi, uMiguel Cardoso, okuvela ukuthi akamboni enendawo esikimini sakhe. UShalulile ubenenkontileka ephela ngesizini edlule kodwa iSundowns isebenzise umbandela wokuyelula ngonyaka ukuze izothola amangqushana njengoba kunamaqembu amfunayo. Phakathi kwalawo maqembu kukhona i-Al Hilal yaseSudan ehlala idlala kwiCaf Champions League, Esperance yaseTunisia neqembu laseQatar elingakaveli igama lalo. Kuthiwa osekuvimbile yimali efunwa yiSundowns ngalo mgadli odlalela iqembu lesizwe laseNamibia.
Ukungabi sezinhlelweni zikaCardoso kukaShalulile kugqame ngempelasonto edlule engabonwa nangokhalo ngesikhathi iSundowns ibhekene neRichards Bay emdlalweni we-quarterfinal eMTN8 abayiwine ngo 4-0 ePitoli. Abanye abadlali abebengekho nguLucas Ribeiro okuthiwa uxoxa namaqembu amfunayo noKhuliso Mudau okuvela ukuthi ufuna ukwenyuselwa umholo.
Njengoba sekucaca ukuthi makhulu amathuba okuthi uShalulile angabe esadlala kwiSundowns, uzolahlekelwa yithuba lokwephula irekhodi lamagoli amaningi emlandweni wePSL eliphethwe nguSiyabonga Nomvethe ngawu-129. UShalulile ulandela ngawu-116.
Ngaphezu kokuphunyukwa yirekhodi lePSL, uShalulile uzolahlekelwa yithuba lokuphatha elomdlali oshaye amagoli amaningi kwiSundowns eliphethwe yinkakha, uDaniel "Mambush" Mudau, esengukaputeni waleli qembu ngesikhathi liwola izicoco eminyakeni edlule. UMudau uhamba phambili kwiSundowns ngamagoli angu-172.
Ukuhamba kukaShalulile eMzansi, kuvulela umgadli weSekhukhune United, uBradley Grobler, ithuba lokwephula irekhodi likaNomvethe kwazise uyena kuphela kwabasadlalayo onamagoli angaphezu kuka-100 kwiPSL.
Related Topics: