KUSEMNYAMA ngokubuyela enkundleni kwesitobha seKaizer Chiefs, uRushwin Dortley, okuphele isizini edlule eselibuka nabalandeli leli qembu.
UDortley (22) ofike kwiChiefs ekuqaleni kwesizini ka-2024/2025 esuka kwiCape Town Spurs kwiMotsepe Foundation Championship, ulimale edolweni esedlale imidlalo engu-18 yeligi eNaturena, wagcina ehlinziwe. Emuva kokuhlinzwa, odokotela beChiefs bebezitshela ukuthi uzoshesha ukubuyela enkundleni okuyinto engenzekanga. Ukulimala kwakhe kumlahlekisele ngendawo eqenjini lesizwe iBafana Bafana kwazise umqeqeshi, uHugo Broos, bekubukeka esethembele kuyena maphakathi emuva.
NakwiChiefs, ukulimala kukaDortley kuholele ekutheni umqeqeshi, uNasreddine Nabi, ashintshe abadlali okubalwa kubona uGiven Msimango, Zitha Macheke no-Edmilson Dove ezama ukuvala isikhala odongeni lwasemuva. Kuphele isizini edlule uNabi esedlalisa umdlali osemncane, u-Aden McCarthy oyindodana yenkakha yeChiefs, uFabian McCarthy. Ngesikhathi iChiefs idlala ne-Asante Kotoko koweToyota Cup eThekwini ngempelasonto edlule, uNabi udlalise u-Aden maphakathi nendawo emuva nokaputeni u-Inacio Miguel. Laba kubukeka kuyibona iChiefs ezoqala ngabo isizini ka-2025/2026.
Leli phephandaba lithole ukuthi uDortley akakakulungeli ukubuyela enkundleni njengoba iChiefs izoqala isizini yeBetway Premiership ngokubhekana neStellenbosch ngeSonto, e-Athlone Stadium, eKapa, ngeSonto.
"Ngeke adlale okwamanje, kusenzima. Yebo, uyile eNetherlands neqembu kodwa nakhona ubengaziqeqeshi nalo. Okwamanje akakalungeli ukudlala futhi akwaziwa ukuthi uzobuyela nini enkundleni. Abanye abadlali bayimiqemane ekhempini," kusho umthombo.
Ngesikhathi iChiefs izicijela ukuqala kwesizini eNetherlands emasontweni adlule, uDortley ubeziqeqesha yedwa ngokugijima. Kulolu hambo, Amakhosi adlale imidlalo yobungani eyisihlanu. Okucacile lapha wukuthi uNabi uzame abadlali abaningi maphakathi emuva. Ngesikhathi iChiefs isemazweni, idalule ukuthi uDortley uziqeqesha kanzima ngaphansi kweso lodokotela futhi usebenza kanzima ukuze abuyele enkundleni. Ucashunwe ethi umndeni wakhe uyameseka kakhulu.
"Lokhu wukulimala kwami kokuqala kudinge ukuthi ngihlinzwe. Kube yizinyanga ezimbalwa ezinzima. Kumele ngiqine ngokomqondo njengoba ngifuna ukudlala kodwa angikwazi. Kunzima kodwa ngiyazi ukuthi kuzolunga," ucashunwe esho kanje uDortley kwi-website yeChiefs.
Ukungalulami ngokushesha kukaDortley kungase kumphuthisele ngethuba lokudlalela iBafana kwi-Africa Cup of Nations (Afcon) ezobaDisemba kuya kuJanuwari 2026.
Related Topics: