UMDLALI weBanyana Banyana, uJermaine Seoposenwe, ubhobonke ngokumenze waqoka ukuyeka ukudlalela leli qembu lesizwe.
UJane umemezele ngaphambi kokuqala komqhudelwano weCaf Women's African Cup of Nations (Wafcon) ukuthi uzohoxa ekudlaleleni iBanyana emuva kawo. Kwenzeka lokhu nje, leli qembu eliqeqeshwa nguDesiree Ellis, lidlale iWafcon ngaphandle kwesinye sezithenjwa, uThembi Kgatlana, esicele ukuhoxa ngenxa yezizathu ezithinta sona. Ngaphambi kokuqala komqhudelwano, abadlali beBanyana batelekile bekhala ngokukweletwa imali yinhlangano eyengamele ibhola eMzansi, iSouth African Football Asscociation (Safa). Lokhu kuholele ekutheni umqhudelwano uqale sekumuncu nakubalandeli bebhola eMzansi. Abaningi bagxeka umengameli wayo, uDanny Jordan, ngokubhimba kwezinto kulo soseshini.
USeoposenwe usibhale ekhasini lakhe le-Instagram isizathu esimenze waqoka ukushiya iqembu lesizwe.
"Usoseshini, ukuqeqeshwa nesiko yikhona okwenza ngiphanyeke amakhokho emgibeni. Uma thina siyisizwe sithi siyalithanda ibhola ngendlela esisho ngayo, sinomthwalo wokuletha ushintsho. Ithemba lami wukuthi ukuhoxa kwami kuzoqala ingxoxo osekuneminyaka siyishaya indiva. Kodwa uma ingenzeki, sengikwenzile okungangami. Futhi ngizolwela ushintsho noma ngayiphi indlela ngoba isizukulwane esilandelayo kusifanele lokho. Njengoba abantu abangaphambi kwami bangicabela indlela ukuze ngibe lapho engikhona namuhla, nami ngizokwenza,"usho kanje.
IBanyana obekubhekwe ukuthi ivikele indebe ye-Wafcon eyayiwina ngo-2022, ibuye ilambatha kulandela ukukhala ngaphansi kwiNigeria emdlalweni owandulela owamanqamu. Yehlulekile nokuthola indondo yethusi ihlulwa yiGhana emdlalweni wokubanga indawo yesithathu.