U-Ouaddou akazami ukuzenza uRiveiro: OwePirates
UMGADLI we-Orlando Pirates uTshegofatso Mabasa akawuboni kangako umehluko phakathi kuka-Abdeslam Ouaddou noJose Riveiro yize lo mqeqeshi waseMorroco engazwani nokungenelwa yigoli
Image: BACKPAGEPIX
UMQEQESHI omusha we-Orlando Pirates, u-Abdeslam Ouaddou, akagxilile ekuzameni ukwenza izinto kangcono kunoJose Riveiro kepha unake ukuqinisa isandla kulokhu okusikhubaze ngesizni edlule njengokuvimba amakhona nama-freekick.
Lawa ngamazwi kaTshegofatso Mabasa ongumgadli waleli qembu elimatasa namalungiselelo okugcina ngaphambi komdlalo we-quarterfinal ye-MTN 8 elizowudlala nePolokwane City ngoMgqibelo ngo-3 ntambama, e-Orlando Stadium, eSoweto.
U-Ouaddou uqashwe yiPirates kulandela ukungavuseleli phakathi kwayo noRiveiro osekungumlando ukuthi usesebenza kwi-Al Ahly yase-Egypt.
Lo mqeqeshi odabuka eMorocco ubezibambele mathupha njengoba leli qembu belibuyele eSpain ukuyocijela ukuqala isizini ka-2025/2026 yeBetway Premiership.
UMabasa obengomunye wabadlali abamqoka ngaphansi kobuholi bukaRiveiro, utshele abezindaba muva nje, ukuthi kawukho umehluko otheni njengoba sekufike u-Ouaddou ngaphandle kwendlela osekugxilwa ngayo ekuvimbeni ukuthi amagoli angangeni ngakwiBucs.
“Angifuni kuzwakale sengathi u-Ouaddou ungumqeqeshi oqala ngokucabanga ngokuvimba izitha ngoba lokho akulona iqiniso kodwa futhi akazwani nokungenelwa yigoli.
“Ngokwami u-Ouaddou uyazifanela noRiveiro ngaphandle kokuthi kuyabonakala ukuthi akafuni siwele ezikhinsini ezifanayo nesingene kuzona ngesizini edlule.
“Ungumqeqeshi oxhumene nabadlali futhi okukhuthazayo ukuthi (abadlali) basebenzise ingqondo yabo kuqala bese kulandela imiyalelo," kusho uMabasa.
Ngesizini edlule, iPirates ishaye amagoli angu-34, yangenelwa angu-20 emidlalweni engu-28 yePremiership. UMabasa ushaye amane kuphela kwiligi kodwa phakathi angu-12 uma sekuhlanganiswa yonke imiqhudelwano. Iqembu elishaye amagoli amaningi kwiPirates kube yiMamelodi Sundowns eyilandise ibhola enethini amahlandla amane emdlalweni ophele ngo 4-1 ngoFebhuwari.
“Ubuthuntu bethu nalapho sibukhali khona u-Ouaddou uyakwazi futhi akasifihleli ukuthi lokhu ukufunde ngokubuka iPirates emidlalweni yangesizini edlule.
“Akukuningi azama ukukushintsha kwebesikujwayele kuRiveiro okwenza izinto zibelula. Uma uzokhumbula ukuphuma kwethu kwiCaf Champions League bekuncike ekutheni amagoli amathathu ePyramids FC kwakungama-freekick.
“Kuyihlazo lokhu uma uzoqhathanisa nokuthi kweyeligi sangenelwa elilodwa kuphela kade kuyikhona. Kumnandi ukusebenza no-Ouaddou futhi nozakwethu abasha bangene khaxa esitayeleni sakhe.
“Ukudlala ngokukhululeka kwabadlali abafana no-Oswin (Appollis) noSipho (Mbule) kuwubufakazi bokuthi u-Ouaddou uwuhlobo lomqeqeshi owenza izinto zibelula kungakhathalekile ukuthi umusha noma umdala eqenjini.
“Okusobala ngaye wukuthi akukho la ebona khona kufanele sithambise kule sizini kusukela kwiligi, eyemkhumulajezi kuya kweyase-Afrika."
Kubanjwe umoya ngokuthi uzobe eseluleme yini u-Appollis ngesikhathi soweMTN 8 kwazise wagcina ethintekile eSpain.