Bangase babuye emazweni bezokwamukela eyePSL
U-JOSE Riveiro obengumqeqeshi we-Orlando Pirates ubalwa nabaqokelwe imiklomelo yePSL asebeshintshe amaqembu njengoba yena esepheka i-Al Ahly yase-Egypt.
Image: AYANDA NDAMANE
IMINXA emihlanu kuma-PSL Awards ka-2025, ingase igoduke nasebedlubha umfaniswano ohlukile kunalo abaqokelwa kule miklomelo beyigqoka ngokwahlukana kwamaqembu namaligi ngesizini edlule.
Umcimbi wokuklomelisa abePremier Soccer League (PSL) abenze kahle ngesizini edlule, uzokhonjiswa bukhoma ngoLwesibili ngo-7 ebusuku kwaSuperSport nakwaSABC.
Umqeqeshi we-Al Ahly yase-Egypt, uJose Riveiro obesemabhukwini e-Orlando Pirates ngesizini edlule nobengumdlali wakhe uMohau Nkota osekwi-Al Ettifaq FC yaseSaudi Arabia, bangabanye babangase babuye emazweni ukuzokwamukela imiklomelo yabo.
URiveiro ongayivuselelanga inkontileka yakhe nePirates ngoJuni, uqokelwe umklomelo weBetway Premiership Coach of the Season awubanga noMiguel Cardoso weMamelodi Sundowns noSteve Barker weStellenbosch FC.
UNkota okhombisa izimpawu zokujwayela ngokushesha kwi-Al Ettifaq, usethubeni lokubuya eSaudi Arabia azokwamukela oweBetway Premiership Young Player of The Season noweNedbank Cup Most Promising Young Player of the Season.
Le minxa yomibili, uNkota uyibanga noMalibongwe Khoza weSundowns nabebengozakwabo kwiPirates uRelebohile Mofokeng noMbekezeli Mbokazi ngokwahlukana kwayo.
Akubona bodwa laba, kepha noJoslin Kamatuka, Mzomuhle Khanyi noLuke Baartman abebekwiDurban City, Hungry Lions neCape Town Spurs ngokwahlukana, nabo bangase bamukele sebegqoke imibala ehlukile.
Nakuba indaba kaBaartman neKaizer Chiefs ingakacaci ngokugcwele kepha lo mdlali uqokelwe koweMotsepe Foundation Championship Player’s Player of the Season noKhanyi osekwiStellenbosch noKamatuka osanda kudedelwa kungalindelekile kwiCity.
NakwiDStv Diski Challenge (DDC) isimo siyafana kwazise uNtandoyenkosi Nkosi obengukaputeni weChiefs kulesi sigaba usengowe-TS Galaxy noTylon Smith oqokwe engoweStellies kodwa usedlalela iQueen’s Park Rangers (QPR) yase-England, babanga oweDDC Player of The Season.
Omunye oqokelwe kulo mklomelo nguGomolemo Kekana oziqeqesha ngokugcwele neqembu elikhulu leSundowns kusukela kubuywe emaholidini okuvala kwesizini.
Sekuphele iminyaka ecela kwengu-18 kwagcina ukuthi umdlali (uChris Katongo) aqokelwe umklomelo wePSL, kudingeke ukuthi abuye emazweni azowamukela.
UKatongo waseZambia owayedlalela iJomo Cosmos ngo-2006/2007, wadla isicathulo segolide ngamagoli angu-15 awashaya ngesiwombe sokuqala sesizini ngaphambi kokuba ajoyine iBrondby IF yaseDenmark ngoJanuwari ka-2007.
Esiwombeni sesibili sesizini, akekho umdlali owafika kumagoli kaKatongo kwadingeka ukuthi abuye e-Europe ezokwamukela umklomelo wakhe.
Njengoba iwindi lokushintshana ngabadlali lisavulile, kungenzeka ukuthi lesi sibalo sikhule ngaphambi komcimbi kwazise kawehli amahlebezi akhomba uLucas Ribeiro e-Europe.